Азонттама Рузаевкаста Агаркофнень лама идень семьяснон колга
Мзяра идь—сняра паваз. Ня валхнень сидеста сашендови кулендемс тядятнень-алятнень эзда. Улема, тя афкукс тяфта. Шабать шачемац фалу лувондовсь оцю кенярдемакс. Тяфта тевсь ащи тянемс. Ламонь-крда павазу тядякс и алякс лувсазь эсь пряснон Рузаевкаста мирттне-рьвятне Евгений Юрьевич и Наталья Анатольевна Агаркофне. Синь семьясост касыхть вете (!) цёрат-богатырьхть.
Наталья и Евгений арасть содафокс лама кизода тяда инголе Рузаевкань железнодорожнай больницяса, коза цёрась сась медицинскяй комиссиянь ётама «РЖД» ОАО-ть эзда, а сай пингонь полац работась офтальмологическяй кабинетонь медицинскяй сестракс.
Наташа нинге шабакс ушедсь арьсема медицинскяй работникокс арамать колга. Шумордазе Ардатовскяй Медицинскяй училищать сестринское дело специальностть коряс. Высшай образования получась М.Е.Евсевьевонь лемса Мордовскяй государственнай педагогическяй институтса, конань аделамдонза меле Наталья Анатольевна арась «Педагогика и психология» специальностть («Олигофренопедагогика» дополнительнай специальностть мархта) коряс педагогокс-психологокс и учителькс-олигофренопедагогокс.
Железнодорожнай больницяса содафтомда меле кафта кизонь ётазь Наталья и Евгений рьвяясть.
Агаркофне фалу арьсесть лама идень колга и сянь квалма, штоба семьясна эряль оцю кудса. Странасонк вяре вастса ащихне лама шаба мархта семьятнень лангс шарфнихть башка мяль, лезнихть теест.
Колмоце идть шачемдонза меле Наталья Анатольевнанди и Евгений Юрьевиченди максфоль модань участка эряма вастонь строямс. Нилеце шабать шачемдонза меле Агаркофнень семьясна, кода лама идень, арась очередьс эряма вастонь условиятнень цебярьгофтомаснон инкса. Кизода меле теест макссть сертификат, конань вельде Наталья Анатольевна и Евгений Юрьевич ушедсть модань участкаснон лангса кудонь строяма.
Мзяра пингонь ётазь Рузаевкаса Агаповонь ульцясонза 140 квадратнай метрань тии кудсь аноколь. Но, штоба лама идень семьяти эрямс тоса, кудти эрявсть ётафтомс инженернай коммуникациятне и газ. Сяс Агаркофне частнай кудснон мзярс нолясазь тевс дача лаца, а эряйхть синь квартираса.
Кенярдемакс арась ся, што тяддень сентябрьста странань населённай пункттнень догазификациянь программаснон коряс Агаркофнень кудс ётафтфоль газ. Тяни синь од эряма вастсост тиихть ремонт, сай кизоть надияйхть ётамс тоза эряма.
Наталья Анатольевна Агарковать валонзон коряс, пара улель, кда Агаповонь ульцяса моли кить лангс шарфтольхть мяль оцюнятне. Тевсь сянь эса, што кутт тоса строявихть, а кись аф пяк цебярь.
Содафттядязь Агаркофнень идьснон мархта. Оцюсь, Владимир, тонафни Рузаевка ошень 10№ школань 11 класса, Илья—6 класса, Михаил—2 класса, Константин якай идень саду. Сембода ёмлась, Мирон, шачсь 2021 кизоня, сяс тядясь тяни декретнай отпускса. Семьянь азорсь Евгений Юрьевич вов ни лама киза покоди машина ки лангса ремонтникокс.
Наталья Анатольевнань валонзон коряс, цёранятне—нят цёранят, кой-коста аф кулхцондыхть. Тяфтома аш кода. Но ёмлатне ваныхть оцюфнень лангс: кода вятьсазь пряснон альнякатне, стане и ёмла браткятне. Сяс тядясна и алясна фалу корхнихть идьснонды, што фкя-фкянди эрь тевса няфнема цебярь кепотькс. Агаркофнень семьяса тиендьсазь семботь, штоба идьсна касольхть цебярь ломанькс.
Т.АЛЬШИНА.