12 январсь Россиять военнай историясонза мяляфтови дата. 1945 кизоня тя шиня советскяй войскатне ушедозь Висло-Одерскяй операциять, конань пингста воляс нолдафтольхть Польшать оцю территориянза, а советскяй войскатне лиссть Берлинть малас.
ЛЕЗДОМОК
СОЮЗНИКНЕНДИ
Польшаса советскяй войскатнень наступленияснон васенда арьсефоль ушедомс 20 январьста. Но 6 январьста, кирдемок мяльса Арденнаса англо-американскяй вийхнень аф кода моли тевснон, Великобританиянь премьерсь-министрсь У.Черчилль эняльдсь И.В.Сталинонди лездомс и эстокиге тумс наступленияс. Союзникнень ширеснон кирдеманкса Верховнай Главнокомандованиянь Ставкати савсь кирьфтамс Висло-Одерскяй операцияти анокламань пингть. Сонь ушедомац ётафтфоль 12 январти.
ЛИССЬ СЯДА ЛАЦ
АРЬСЕФТЬ КОРЯС
1945 кизонь 12 январьста Якстерь Армиясь ётась наступленияс, тяда инголе ульсь вии артиллерийскяй атака. Фатяф участкатнень эса ляцендсь 250-300 орудия 1 вайгяльбеса. Получамок сатомшка боевой запас, советскяй орудиятненди ульсь кода мольфтемс давол лаца ляцендема.
Лиссь сяда лац арьсефть коряс. Кой-мзярошкада тя сянкса, мес немецне шашфтозь резерваснон передовойти и повсть артиллериянь машфты толть алу. Сяс васенце вии эрьхтемада меле миннетне тапазь аф аньцек васенце эшелононь дивизиятнень, но и немецнень вии резерваснон. Тя вятсь врагть оборонань сембе ширензон срадомаснонды. Вастста вастс шашфневи оцю резерватнень вельде Якстерь Армияти удалась курокста молемс инголи.
«Вислать фтала руснень наступлениясна мольсь пяк вишкста,—тяштсь немецкяй генералсь Меллентин.—Аш кода азомс семботь, мезе лиссь Вислать и Одерть ёткса 1945 кизонь васенце кофнень. Европась ашезь няенде мезевок тяфтама Римскяй империять юмама пингстонза сявомок».
Наступлениянь ветеце шиня Якстерь Армиясь сявозе Варшавать, а сембоц тя операциянь 23 шиста тялонь якшама пингть Г.К.Жуковонь и И.С.Коневонь армиясна ётасть 500 вайгяльбе инголи, занязь Краковть, кружазь немецкяй оцю группировкать Познаньца. Январть песта-февральть ушетксста советскяй войскатне лиссть Одерти и кержи трвасонза фатясть плацдармат, конат ульсть 60-70 вайгяльбень вастса Берлинть эзда. Тяса и шумордавсь Якстерь Армиять наступленияц.