Рузаевкаста мокшалясь Виталий Чудаев аф кулемас коре содасы, мезе стамсь войнась. Сон СВО-нь ветеран, пцтай киза ульсь передовойса.
Мзярда ушедсь специальнай военнай операциясь, Виталий Павлович ламос ашезь арьсекшне, нинге мобилизацияда инголе тусь фронту контрактс коре.
«Молемс тоза, тиемс путкс марстонь тя тевти эряви эрь аляти! Кие, кда аф минь? Аш кода лядондомс ширеса тяфтама пингста!»—тяфтамот мокшалять мяленза-арьсеманза.
Виталий Чудаев шачсь и кассь Атюрьевскяй райононь Красновка велеса. Семьясна оцюволь. Тядянза-алянза касфтсть кемонь шабат, конатнень ёткста тячиень героеньке мекольцесь. Виталий Павловичень родителенза простой колхозниктольхть. Лама трудендакшнесть, но и идьснонга маштсть касфтомс цебярь ломанькс. Тонафтозь улемс трудонь кельгикс, сталмода-стакада аф пеликс, лац шарьхкодемс, мезсь эряфса питни, а мезсь аф сяшкава. И тя пяк лездсь и лезни героеньконди эряфонь киге аськолямста.
Школаса Виталик тонафнесь лац. Васенда «нилес» и «ветес» аделазе Красновкань колма кизонь школать, сяльде, 9-це классти молемс, пуропнесь содамошит Арга шабрань велеса, а тоса—Атерьса. Сяда тов ульсь армейскяй службась. Служась Белоруссияса, Польшаса, Смоленскяйса… Получась аф кальдяв боевой опыт. Армияда меле мокшалясь васенда покодсь ОМОН-ца, сяльде—милицияса, тяни трудендай «Ресурстранс» организацияса.
Мзярда ушедсь специальнай военнай операциясь, Виталий Чудаев васенцетнень лувксса стясь странанц суверенитетонц и интересонзон аралама. Контрактс коре повсь «Сияжар» подразделенияв и марса лия земляконзон-доброволецнень мархта тусь фронту.
Мордовскяй батальонць пяшкотькшнесь боевой задачат Северодонецкяй райононь Кременная ошть маласа. Виталий Павловиченди фалу сашендовсь улендемс инь «пси» вастса—передовойса. Сон пачфнесь боеприпаст пехотати, миномётчикненди, танкисттненди.
Боевой операциятнень колга мокшалясь лама ашезь азонда, но фкять китькснезе аф весть: фронтса кяденьбецек савсь улемс национальностьс, верас, кизос коре аф фкя лацонь ломань мархта и эрсь апак пельхть пяшкодезе долгонц педа-пес.
—Эрь цёрась, алясь, кона тячи «лентанять тона боксонза», афкуксонь герой и оцю букваста Патриот! Теест святойхть «честь», «долг» и «патриотизма» валхне!—мярьгсь ветеранць.
Виталий Павлович виденцясь, што тоса, коса эрь минутась ётни оцю пелькс ала, ломаттне няфнесазь пряснон ёфси лия ширде. Минь боецоньке, СВО-нь ветеранть валонзон коряс, афкуксонь алят, конатнень лангс ули кода надиямс. Синь и пулятнень эзда аралатядязь, кда эрявксты, и кяштядязь, и лездыхть. Передовойса синь арсихть фкя-фкянди цебярь ялгакс и нльне брадкс.
Кода азозе мокшалясь, фкя инь пелькссь фронтса—дроттне. Синь лиендихть сембе ширде и шинек-венек. Модать лангсовок минаса ацаф вастта аф кржа. Сяс эряви улемс пяк и пяк внимательнайкс. И виде, кле, минь бта ушеткшнеме няема шобдасовок.
Оцю кеняртьксокс улендсть радня и мала ломаттнень мархта телефононь пачк корхнематне. Ужяленди, тиендемс тянь удалсесь аф сидеста. Но тя эжнесь седи и макссесь вийхть.
—Гайфтят, кульсак, што синь сембось лац и, мярьгат, пацятне шачихть, шарьхкотькшнесак—сембось аф шавос,—азозе ветеранць.
А нинге, Виталий Павловичень валонзон коряс, фронтса пяк касфнихть мяль сёрматне, конатнень кучсесазь шабатне, синь рисункасна. Кудста аньцяй кулясь, кле, боецненди оцю ила.
Мелянь апрельста Виталий Чудаев мрдась мирнай эряфти. Но СВО-сь аф нолясы. Мокшалясь фалу ваны сянь мельге, мезе тячи тиендеви фронтса. Ризнай боецнень инкса, конат тяни передовойсот. Гайфни служай ялганзонды, кирни мархтост соткст.
1 августста сявомок Россияса касфтовсть котрактс коре служайхненди единовременнай пандоматне. Виталий Павлович лувондсы тянь цебярь лезксокс боецненди. Но фронту, кле, кеман, ламоцне тушендыхть аф ярмаконкса, а сяс, мес мяльсна лездомс странаснонды.
«Минь сяськсаськ фашизмать. Эрть, кие тячи передовойса, мялец, штоба тя конфликтсь куроконе аделаволь. Но аньцек сяськомаса. Штоба мрдамс куду, кода атяньке 1945 кизоня, и гордостень марязь азомс, што врагсь тапаф. Минь воиноньке маласькофнесазь тя шить сембе вийса. Сяськомась ули мельганк!»
Ольга ЕВДОКИМОВА.