Владимир Путин максозе «Тядя-героиня» лемть республикань эряйти

Российскяй Федерациянь Президентть 2023 кизонь 4 сентябрень Указонц мархта семьянь институтть кемокснемаса и идень воспитандамаса сатфксонкса «Тядя-героиня» лемсь максф Мордовиянь эряйти Ольга Петровна Исайкинати. Мирденц мархта синь касфтыхть-тряйхть 10 шабат. Ёмлати—8 кизот, оцюти—25.
Ольга Петровна шачсь Самарскяй областень Нефтегорскяй райононь Утевка велеса. Якстерь дипломса шумордазе М.Е.Евсевьевонь лемса МГПИ-ть (тяни МГПУ) «Филология. Английский язык и педагогика» специальностьс коре. 1997 кизоня лиссь рьвакс и лемдезе эряфонц шабань касфтомати.
Мирттне-рьвятне самозанятай ломатть. Ольга Петровна занци пря кодамаса, лия кядьтевса, а Александр Васильевич—отделочник строительствань сфераса. 2018 кизоть самс Исайкиттнень семьясна эрясь Саранскяйса, а сяльде ётасть эсь кудозост Лямбирскяй райононь Берсеневка вели. Тядятне-алятне оцю ответственностень марязь малаткшнихть идьснон воспитандамаснонды и тонафнемаснонды.
«Мзярда содайне, што тейне максови тяфтама оцю звания, ламос ашень верондав и улень павазу. Мялезе азомс сюкпря Президентоньконди российскяй семьятнень, лама идень семьятнень лангс мялень шарфнеманкса, мес приметнесы минь ламотненди аф няеви трудоньконь. Арьсян, што иттнень воспитандамаса васенце вастса улеза кельгомась, паронь арьсемась и шарьхкодемась. Улемс родителькс—оцюдонга оцю ответственность! Тейнек мирдезень мархта иденьке—главнай павазоньке»,—азозе Ольга Петровна Исайкина.