Темниковскяй райононь Вельмаева веленяса эряй-ащи трудонь кельги мокшавась, войнань пингонь идсь, велень хозяйствань ветеранць А.Н.Ерёмкина. Эряфонь киц сонь аф тёждятнень эздоль.
Анна Назаровна шачсь 1939 кизонь 21 ноябрьста Митряскиттнень семьяса. Кафта кизонятольхть теенза, мзярда ушедсь Великай Отечественнай войнась. Вельмаеваса аф сетьмоль. Аватне прважсезь эсь мирдьснон, цёраснон, брадснон войнав. Сембе авардсть, ризнасть. Тусь немецко-фашистскяй захватчикнень каршес тюрема и Анна Митряскинать аляц, Назар Михайлович. Тумстонза ашкодозень кельгома рьванц, Евдокия Андреевнань, колма стирензон и мярьгсь:
—Тапасаськ фашисттнень и сяськикс мрдатама куду.
Урокодсть тядяц, аканза. Анна Назаровна эста лац-ряц ашезе шарьхкотькшне, коза срхкась аляц и што мекольцеда няйсы кельгома ломаненц. 1941 кизонь октябрьста Н.М.Митряскин шавовсь бойса. Теенза ульсь 29 киза. Великай Отечественнай войнаса ульсть Назар Михайловичень колма брадонзовок. Алексей и Пётр тяфта жа шавовсть бойса, Андрей мрдась куду стакаста ранендафста, кафтошка кизода меле тусь эряфста. Евдокия Андреевна лядсь ёфси ськамонза колма ёмла шаба мархта. Ашель кинди пшкядемс, кинь кядьста анамс лезкс. Рьвакс оду ашезь лисенде. Ськамонза касфтозень колма стирензон. Еленати эста ульсь сисем, Александрати—вете, Аннати—колма кизонят. Удавась покодсь колхозса. Сашендовсь трудендакшнемс шобдаваста сявомок илятти самс. Иттне и Евдокия Андреевна няйсть вачаши и лама нужа. Сашендовсь ярхцсемс паксяста кочкаф наксада модамарьда, тишень и лопань цюкорняда. Ашель мезе щамс лангозост. Эста аф аньцек синь тяфта эрясть. Ашель Вельмаеваса стама куд, конань кенкшс афоль чака Великай Отечественнай войнась. Ламотнень ашесть мрда куду алясна. Но синь кирдсть, аф пелезь сяськондезь сембе стакатнень-сталмотнень.
Е.А.Митряскина трудонь кельгикс, сталмода аф пеликс касфтозень эсь стирензон. Анна Назаровна Вельмаева велеса аделась сисем класст. Тонафнесь аф кальдявста. Пяк кельгозе книгань лувоманц. Велень библиотекаста морафтозень сембе книгатнень. Но штоба получамс средняй образования, эрявсь молемс тонафнема Темниковскяй райононь Ишейка вели или Атюрьевскяй райононь Каргоньжяи. А школав молеманкса эрявсть цебярь щапт. Но синь эрясть ашуста. Мзярда получасть алянц лангс похоронка, атяц панезе кудста удавать колма стирензон мархта. Одукс савсь ладямс эряфсна-ащефсна. Сяс сисем классонь аделамда меле Анна Назаровна тусь покодема почтальонкакс. Связень отделениясь ульсь Идеева татаронь велеса. Тя колмошка вайгяльбень вастса Вельмаевать эзда. Эста велесь оцюволь. Велеряйхне тяштьфнесть ламонь газета и журнал. Анна Назаровна вете кизот пачфнезень синь велеряензонды. Мзярда сяда кассь, тусь покодема «17 партсъезд» колхозу дояркакс. Хуш и ашель образованияц, но жувататнень колга содазе семботь. Морафнесь лама книга, кочкаф содамошинзон ётафнезень эряфс. Потьнесь ламонь лофца. Старандась ванфтомс вазыяф эрь вазнять. Лия дояркатнень ульсть юмафкссна, а сонь ашельхть, сяс мес маштсь перьфкаст шарома. Сембе тевонзон тиендезень совестьс коре, оцю ответственностень марязь. Колхозонь оцюнятне приметнезь тянь, аф весть Анна Назаровнань трудонц отмечсезь оцю казнеса. Дояркань тевти трудонь кельги мокшавась макссь 40 киза. 1971 кизоня А.Н.Ерёмкина казьфоль Трудовой Якстерь Знамянь орденца. Сидеста лисендсь сяськикс Социалистическяй пялькстомаса, ульсь пятилеткань ударникокс. Казьф российскяй, республиканскяй, районнай уровенень аф фкя Почётнай грамотаса, Дипломса, Сяськиень Кубкаса, ВДНХ-нь медальса. Аф весть сявондезь ВДНХ-в кода райононь и республикань передовой дояркань, пялькстомаса сяськиень. Колмошка созыв ломаттне кочксезь Анна Назаровнань велень Совету депутатокс. И депутатонь тевонзонга пяшкотькшнезень седикс-ваймокс, мзярдовок ашезь кяшенде лиятнень фталу.
Мирдец, Фёдор Афанасьевич, ульсь агрономкс, пчеловодкс колхозса. Полатне касфтсть фкя стирь. Н.Ф.Терёшкина школада меле тонафнесь Н.П.Огарёвонь лемса Мордовскяй госуниверситетонь историческяй факультетса. Лама киза покодсь Торбеевскяй, Темниковскяй райононь школатнень эса. Вятсь историянь урокт Атюрьевскяй райононь Бораж велень основной, Каргоньжяень средняй общеобразовательнай школатнень эса. Мирдец, Геннадий Андреевич, стане жа педагогическяй трудонь ветеран. Касфтсть кафта итть. Светлана аделась правовой академия, покоди Москуса юристокс. Еленань кафта высшай образованиянза: экономическяй и педагогическяй. Эряй и покоди Саровса. Анна Назаровнань уноконь кафта иденза.
Тядде Великай Сяськомати топоди 80 киза. Анна Назаровнань марнек семьяц пуроми Вельмаева вели, штоба нинге весть лятфтамс войнань стака кизотнень, сянь, мезе савсь ётамс трудонь кельги мокшавати. Сон лятфтасыне алянц, Назар Михайловичень, колма оцянзон, конат максозь эряфснон Родинаньконь инкса.
Илья ВЕШКИН.
Снимкаса: А.Н.Ерёмкина.