«Стопмошенник13» телеграм-каналса пачфневи, што Россиянь УМВД-ть Саранск ошень округть эзга 4№ полициянь отделонь следовательхне ушедсть уголовнай тев ся преступлениять признаконзон коряс, кона канневи РФ-нь УК-ть 159 статьянцты 3 пунктонцты (мошенничествась).
Кода содазь полицейскяйхне, аф кунара университетонь 34 кизоса доцентсь получась мессенджерса сообщения сянь колга, што вузса правоохранительнай оргаттнень сотрудниксна ётафтыхть тонафнемань заведениянь сотрудникнень каршес мошенничествать содаманц коряс проверка.
Пингонь ётазь преподавательти гайфтсь бта силовой ведомствань сотрудник и пачфтезе, што тя проверкать пингста содаф: кати-кит ёрайхть саламс банковскяй счётса ванфтови ярмаконзон. Гайфтись мярьгсь тяниёк синь валхтомс и путомс аф пелькс счётс, конань номеронц азозе. Тиемок семботь кода мярьгсь мошенниксь, доцентсь банкоматть вельде ётафтсь теенза 524 тёжянь цалковай. Тяда меле гайфтись азозе, што средстватнень гарантия ала ванфтоманкса сявома кредит, кона стане жа ётафтома (ярмакнень) аф пелькс счётс. Тя пингть наукань кандидатсь шарьхкодсь, што тись эльбятькс и пшкядсь внутренняй тевонь оргаттненди.
Полицейскяйхне лятфнесазь: кда поступась банковскяй счётонтень мархта сотф прябалатнень колга информация, теенть лична пшкядема финансово-кредитнай учрежденияв. Мяляфтость, правоохранительнай органонь и банконь сотрудникне аф анцесазь телефононь вельде граждаттнень колга конфиденциальнай информациять и аф мярьгондихть ётафнемс ярмакнень аф пелькс счёттненди.