Старошайговскяй райононь Сире Шайгав велеста Якомаскиттне сувасть «Семья года-2022» Всероссийскяй конкурсонь сяськихнень ёткс. Синь лувфт инь цебярькс «Семьясь—коень-обуцянь ванфтысь» номинацияса. Мирттне-рьвятне Иван Степанович и Ольга Васильевна марсот 44 киза ни. Синь ниле идьсна и кафта уноксна.
Якомаскиттнень колма стирьсна—приёмнайхть. Ольга Васильевна сонць кассь тядяфтома-аляфтома и фалу пяк мялецоль лездомс иднятненди, конат лацонза лядсть тядянь-алянь заботафтома, семьянь лямбофтома. Тяфта семьясост эвондасть колма приёмнай стирнятне—Анна и акатне-сазорхне Мария и Нина.
Семьянь азорсь, Иван Степанович, профессияс коре строитель, сон строясь эсь семьянцты кафта этажса куд шачема-касома велесонза. Ломаттне синь трудонь кельгихть, кодамот аф сидеста васьфтят. Якомаскиттнень оцю хозяйствасна. Кудазоравась, Ольга Васильевна, нинге пяк цебярь мастерица. Сон тиенди мокшень национальнай костюпт и мазоптомбяльхть: петькст, цифкст, крганят, коняфкст и марнек странаньконь келес содаф някат-мокшаванят. Тя тевти Ольга Васильевнань нинге шабакс тонафтозе бабац.
Мокшень щамонь стамась-тиемась арась Якомаскиттненди семейнай тевкс, кода тяни примаф корхнемс—хоббикс. Оцю стирьсна Марина сатни аф ёмла сатфкст профессиональнай тевсонза, сон покоди воспитателькс идень садса и аф весть арсесь профессиональнай маштомошинь Всероссийскяй конкурсонь лауреатокс. Но аньцек эвондакшни ётка пингоц, оцю мяльса сявондьсыне кядезонза сюретнень-салмокснень и арси тядянцты васенце лездыкс. Якомаскиттнень уноксновок шарфнихть ни мяль народнай творчествати. 11 кизоса Колясь, кепотьксонди, сонць котци ёмла ожнаняста мазоптомбяльхть.
Ольга Васильевнань и Иван Степановичень пара мялезост, мес стамась-кодамась—тевсь, кона ётась теест атяснон-бабаснон эзда, тяни тонатф и кельгови идьснонды-унокснонды, и надияйхть, што сон сяда товга кармай ётнема поколенияста поколенияс.
«Семья года-2022» конкурсть финалс лиссть Россиянь 353 семьясь, а сяськикс арасть 85 участниксь вете номинацияс коре: «Лама идень семьясь», «Од семьясь», «Велень семьясь», «Зрнянь семьясь», «Семьясь—коень-обуцянь ванфтысь».
Сёксенда сяськихне примайхть участия семейнай фестивальса. А казевихть синь 27 ноябрьста—Тядянь шиня.