Ярмакне «шудихть» аферисттнень зепс

Кода пачфни «Стопмошенник13» телеграм-каналсь, октябрь ковста Мордовиянь эряйхне ётафтсть мошенникненди 28 миллион цалковай.
Тяддень октябрьста Мордовиянь внутренняй тевонь оргаттненди ярмаконь саламать колга заявления мархта пшкядсь республикань 130-да лама эряй, конат юмафтсть 28 миллионда лама цалковай.
Преступлениянь тиемань инь сидеста васьфневи способкс арасть сим-картать действиянц и связень услугатнень договорснон кувалгофтомасна, а нинге аф санкционированнай валхтовомада араламась и тяфта лемневи резервнай счётс сбережениятнень сяда тов ётафтомаснон мархта сотф кредитть сявомац. Азсаськ, што 70-да лама ломанць юмафтсь пцтай 18 миллион цалковай.
Нинге 30 ломанць ётафтсть мошенникненди 5 миллиотт работань вешемста и ярмакнень инвестированиястост.
Мордовия Республикать эзга МВД-сь лятфни: кда теенть гайфтсть ломатть и азондсазь эсь пряснон банконь или полициянь сотрудникокс—гайфтеда тинць финансовай организациятнень и правоохранительнай оргаттнень официальнай номерснон коряс.
Тяда ётафне инголенди пандома лаца ярмакт товаронкса, а нинге тясть пачфне киндивок банковскяй картатнень сембе реквизитснон, PIN-кодть, CVC/CVV-коттнень и операциять кемокстаманкса тевс весть ноляви парольхнень. Теенть ярмакнень ётафтомаснон инкса сатомшка содамс банковскяй картать номеронц.