Ётафтовсть СВО-нь участниконь шит

Торбеевскяй и Атюрьевскяй райоттнень эса ётафтовсть СВО-нь участниконь шит. Лятфтасаськ, ня мероприятиятне водендафт специальнай военнай операциянь участникнень и синь семьяснон ширеснон кирдеманцты.
СВО-нь участниконь шитне ётафневихть республикань райоттнень эса Мордовиянь Оцюнять Артём Здуновонь поручениянц коряс Стратегическяй инициативань агентствать и «Защитники Отечества» фондть ширень кирдемаснон вельде.
Торбееваса мероприятиясь ётафтовсь Культурань кудса. Эсонза примасть участия МР-нь Оцюнять старшай советникоц Татьяна Алиходжина, Торбеевскяй райононь оцюнясь Сергей Шичкин, междисциплинарнай комиссиясь, коза сувасть Здравоохранениянь министерствань, Населениять социальнай ширде араламань министерствань, Социальнай фондонь представительхне, военнай комиссархне, юристтне и психолокне.
Специальнай военнай операциянь участникнень кизефкссна васендакиге сотфтольхть выплатань получамать, СВО-нь участникнень и ветераттнень медицинскяй обеспеченияснон мархта. Эрь пшкядемась сявф мяльс.
Атерьса СВО-нь участниконь шись стане жа ётафтовсь Культурань кудса.
—Минь отвечаме сембе кизефкснень лангс, конат максфтольхть тейнек. Ламошкасна сотфтольхть медицинскяй реабилитациять, выплататнень оформляндамаснон и ширень кирдемань юридическяй мератнень мархта. Кизефкснень оцюшка пяльксснон ули кода решандамс районнай уровеньца. Башка стака кизефксненди канневихть сят, конат сотфт куляфтома юмафнень мархта. Но и тясовок старандатама максомс сембе эрявикс лезксть,—азозе Татьяна Алиходжина.