Ётась эряфонь кувака ки

Илядень велеть келес кайгсь гармониять вайгялец, мархтонза шудезь-шудесь мазы мора. «Эх, кода лац морайхть,—мярьгсь фкя бабанясь омбоцети.—А кит шта морайхне, аф содасак?» «Да кода кит,—поладозе корхтаманц омбоце бабась.— Анна Поленовать семьяц. Аннати тячи—90 киза…»
Анна Фёдоровна Поленовась трудонь ветеран, тылонь труженница. Сон марнек эряфонц ётафтозе тязк Инсара аймаконь Навлей велеса. Шачсь 1932 кизонь 24 июльста. Идькс пингстонза сембодонга оржа лятфнембялькс лядсь ся, кода марса оцю патянц мархта прважазь алянц Кадошкинав, коста сон тусь фронту. Инголи, кле, няфтсть фильма, а тоса сембонь озафнезь поезду. Алянц шиса тяда меле синь оду вестевок ашезь няе. Ванфтовсь аньцек фотографияц. Анна баба сидеста тарксесы сонь, няфнесы уноконзонды, уноконь идензонды. «Тя монь алязе»,—корхни кельгозь сиренясь.
Анна Фёдоровнань семьяса вете идьтостольхть. Эряфсь эста аф тёждяль, вачедоль. Но бабась аф пеняцякшни идькс пингонц лангс.
—Эряме минь аф кальдявста. Вачаши пяк ашеме няе, модамарьда ярхцсеме. А кинь-бди ся кизотнень марожень кшиняцка ашель топодемс. Ужялькшнемазь минь атязе. сон котцесь ленгяста карьхть и мишенкшнезень шабра велева. Сатф ярмакть лангс рамсесь почф, ямкст, тяфта и трясь эсонк.
Анна Фёдоровна аделась аньцек ниле класст. Эста Навлейса ульсь начальнай школа. Сяда тов тонафнема эрявсь якамс Болду. Мокшень тя велесь ся пингть ульсь райцентракс. Аннавок срхкась тоза тонафнема. Эрясть квартираса. Пандоманди азоравась кядьстост вешсь пенгат. А коста синь сявомат? Стирняти савсь мрдамс меки куду. Сон ушедсь покодема колхозса. Эста сембонди мушендовсь тев. Шабатневок лезнесть, коза сатнесть вийсна. Витцесть снав, шинжарома, каньф, табак. Мзярда Анна сяда кассь, ушедсь якама вирень керома.
—Тя тяни кемготува, кемзисемге кизоса ломаттне нинге лувондовихть шабакс. А минь ни оцюфтолеме. И вешсть эздонк, кода оцю ломаньцта,—лятфни сиренясь.
Рьвакс Анна лиссь кемгафксува кизоса эсь велень цёранди, Иван Андреевич Поленовонди. И кизотне кармасть шудема фкя-фкянь мельге. Васенцекс шачсь цёрасна—Александр. А тоса фкя-фкянь мельге—сисем стирьсна: Мария, Анастасия, Нина, Наталья, Валентина, Лидия, Татьяна. Сембонь Иван мирденц мархта касфтозь пара ломанькс, макссть эряфс кели ки. Иттне, касомок, срадсть Россиять келес.
Анна Фёдоровна марнек эряфонц лемдезе колхознай бригадаса работамати. Кодама аньцек тевс ашесть кярьмотькшне аватне. Лядендсть паксят и лугат, касфнесть имошт и перень сёрот и тиендсть лия тефт. Аф фкя киза савсь покодемс сёронь складса дробилкаса. Тоса сон яжафнесь фураж.
—Мон ськамон кепсень-шарфнень стака кяскафт. А пульсь! Ваймоце афоль таргав. Эста прянь ужяльдема минь ашеме машта. Тевсь эрявсь тиемс и сембе,—сяда тов азондсь Анна баба.
2002 кизоня А.Ф.Поленовати максфоль «Трудонь ветеран» лем.
Аф кунара Анна бабанди топодсь 90 киза. Сонь 13 унокоц и 22 уноконь идец. Синь аф юкснесазь сире щаваснон и бабаснон, сашендыхть инжикс. Сон эрть лац мяляфтсы, пара мяльса корхни мархтост, хуш кули ни пяк кальдявста. Нинге сиренясь шнафты пря од кудонц мархта. Тяса аньцек аделавсть петемань тефне. Кеподьсы кяденц сери поталакти, ванода, кле, кодама сембось мазы. Анна баба лятфнесы, кода Иван мирденц мархта мзярда-бди строязь тя кудть эсь вийсост. Кафта кизот аньцек ётась рьвяямдост меле и лиссь оцю зиян. Кудсна палсь марнек. Но кядьснон ашезь нолда, путсть од. Тяса шачсть и кассть сембе идьсна. Но пингонь ётазь сон таштомсь и ширемсь. Тялонда тяса эрямс ашель кода, пяк кельмоль. Арьсесть сонь петемс.
Мекольдень комсь кизотнень, кода лядсь удавакс, Анна Фёдоровна эряй стиренц, Нина Ивановна Кильмяшкинать мархта.
—Тядязе пяк пара вайме ломанць. Мезевок аф веши, аф пеняцяй мезеньге лангс. Сембось мялезонза. Минь сембонь путомазь пильге лангс. Эряфоньберьф прянь апак ужяльтть покодсь, штоба минь улелеме топодьстот, щафт-каряфт. Тяни тядяньке ни сиредсь. Эздонза минь марятама кельгома и ваймонь лямбоня.
И. ФАДЕЕВА.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...