Юмафтсь пяле миллион цалковай

«Стопмошенник13» телеграм-каналсь пачфни Саранскяйста Дарьянь историянц колга.
Сонь стирец юмафтсь пяле миллион цалковай, примамок участия питнефтома челленджса.
Милананди 9 кизот, и тяфтама казнет аф кизос коре ёню стиренц эзда Дарья ашезь ученда. Весть авась няезе, кода стирец корхни видеосвязть вельде стирь мархта. Миланань кядьса—тядянц смартфоноц, шрать лангса—банковскяй картац. Аньцек Дарья сувай комнатав, корхни ялгась эстокиге юмай. Авась меле няезе, што ремонтонди кочкаф 460 тёжянь цалковайсь юмась.
Содавсь, што стирец ёрась добувамс виртуальнай валюта онлайн-налхкоманди: сёрматфтсь пря соцсетьтнень эса фанаттнень коналозост, получась лия подписчицань эзда сообщения и содазе, што ули кода получамс валюта питнефтома, кда примамс участия челленджса.
Васенце заданиятне аф стакатольхть и сотфтольхть аньцек налхкомать мархта. Кепотьксонди, сувамс налхкомань лавкав и тиемс сянь скринонц, мезть мяльце рамамс. Меле Милананди мярьгсть кучемс тядянц фотографиянц. Сяда тов—вешемс сонь телефононц и тиемс экранть снимканзон. Милана содазе парольть, сяс пяшкодезе и тя заданиятьке. А нинге азозе тядянц номеронц.
Тяда меле «налхкомать коряс ялгац» мярьгсь, што Милана ётазе челленджть и азсь мяль гайфтемс фкя-фкянди видеосвязть коряс. Тяфта, кле, сяда курок азса, кода получамс призовой ярмакнень. Стирсь мярьгсь, што ётафтсыне синь тядянц картанцты, а тоста синь ули кода сувафтомс налхкомати.
Сяс Милана азозень корхни ялганцты тядянц картанц лангста сембе цифратнень, а нинге саф несколька коттнень. Мзярда комнатав сувась Дарья, стирсь «сязезе» гайфтемать, а мархтонза сембе перепискась юмась.
Банкса азозь, што ярмакнень аф мрдафтсазь, сяс мес Дарья колазень безопасностень правилатнень—сонь аф осторожнайкс улеманц инкса сембе салавань даннайхне повсть преступникнень кядьс.
Мезе лиссь?
Дарьянь стиренц вельде аферисттне содазь сонь телефононь и картань номеронзон.
Смартфонть скринонзон колга шарьхкодезь, банковскяй кодама приложениятнень нолясыне тевс.
Меле сувасть онлайн-банкозонза, полафтозь картань номерть и парольть—синь азозень стирнясь, и ётафтозь ярмаконзон эсь счётозост.
Кой-кона банкне тиендихть блокировка од устройстваста приложенияти или личнай кабинету сувамста. Штоба ётамс араламать вакска, кой-коста васькафнихне кошярясазь идть сувамс тядянц или алянц телефонца банковскяй приложенияти и ётафтомс теест ярмакнень. Инструкциять тянь коряс макссесазь видеосвязть вельде.
Кода вятемс пряцень, штоба аф юмафтомс ярмакнень?
Тевс нолясть финансовай безопасностень правилатнень и тонафтость тянди шабать:
-Тиеда стане, штоба телефонти афоль уле доступ—ладяда сурть отпечатканц коряс сувама и киндивок тясть азонда парольхнень, тяконь лувксса иттненди.
-Лац-ряц азондость шабати, што банковскяй картась—личнай, сонь аш кода сявондемс апак кизефтть. А кда азомс картать даннаензон и коттнень аф содафненди, то теест ули кода саламс сембе ярмакнень.
-Пачфтеда шабати сянь колга, што преступникне маштыхть «ялгакс» арама. Кепотьксонди, латцихть ялгаксшинь соткст социальнай сетьтнень, тематическяй каналхнень эса, а меле сотцесазь салавань информациять.