«Зарница» налхкомась пуропнесь 15 команда

17 майста Мордовиянь Оцюнясь Артём Здунов Кочкуровскяй районца васетькшнесь «Зарница 2.0» налхкомань региональнай этапонь участникнень мархта.
«Зарницась»—тя Васенцетнень Движенияснон флагманскяй проектоц, кона сотнезень эсь эсонза ётай пингонь наследиять (спортонь военно-прикладной виттнень) и тяниень пингть (цифровой технологиятнень и одкстоптф снаряжениятнень). Республикаса налхкомать отборочнай этапонзон эса примась участия 15 тёжяньда лама ломань. Сембе райоттнень эса ётафтовсть муниципальнай этапт. Инь цебярьхне арасть региональнай этапонь участникокс, сяськихне няфтьсазь республикать окружной уровеньца.
Кочкуровскяй району пуромкшнесь 15 команда. Синь наставникснон ётксотольхть специальнай военнай операциянь боецт и ветератт, силовой структурань представительхть.
«Зарницати» сувафтфоль лама пялькстома-мезе, лувкссост—военизированнай эстафетась, общевойсковой грамотностсь, строевой подготовкась, российскяй государственностень и военнай историянь основатне, тактическяй медицинась, огневой подготовкась, радиационнай, химическяй и биологическяй аралафшись, экстремальнай условияса шиса лядомась, инженернай оборудованиясь, тактическяй подготовкась.
Республикань Оцюнясь ванозень пялькстомань площадкатнень, корхнесь шабатнень и наставникснон мархта.
Тяса жа ётафтовсь Мордовия Республикань Васенцетнень Движенияснон мархта марстонь тевонь вятемать коряс Координационнай советть выездной заседанияц.
Артём Здунов китькстазе: пяк важна кирнемс шабатнень инициативаснон ширеснон. Тя тевса цебярь лездыкс ащи Васенцетнень Движенияснон грантовай конкурсоц. Мордовиясь тяса сувась максф заявкатнень лувксснон коряс лидерхнень лувксс. Киртьф 16 миллион цалковаень суммас 12 заявкатнень ширесна.
Заседанияса корхтафоль од поколениять военно-патриотическяйста воспитандаманц коряс работать, мялень салай проекттнень эряфс ётафтомаснон колга.