«Защитники Отечества» фондть филиалонцты топодсь фкя киза

Меля Россиянь Президентть Владимир Путинонь инициативанц коряс странаса панжевсь «Защитники Отечества» фондсь. Сонь филиалонза улихть сембе региоттнень эса. Тя событиясь арась туфталкс торжественнай мероприятияти, коса примасть участия МР-нь Правительствать Председателенц васенце заместителец Галина Лотванова, специальнай военнай операциянь ветераттне и шавф участникнень семьянь членцна.
—Кизоньботмоста ульсь пяк лама события,—мярьгсь Галина Лотванова.—Тя пингть регистрировандаф 11,5 тёжянь пшкядема, 3 тёжятть гайфтема-консультация. Мордовиянь Оцюнять Артём Здуновонь мархта инколенк путф задача—специальнай военнай операциянь боецненди и синь семьяснонды мялень шарфнемась. «Защитники Отечества» фондть филиалоц—тя ся площадкась, коса эрявихть кепсемс сембе кизефксне, конат водендафт ломанти. Аф стак Мордовияса филиалть работанцты оцю оценка макссь «Защитники» Отечества» фондть руководителец Анна Цивилева.
Галина Лотванова арьсесь СВО-нь ветераттненди кемодонга кеме шумбраши. Стане жа МР-нь Правительствать Председателенц васенце заместителец макссь фондонь сотрудникненди Благодарственнай сёрмат.
«Защитники Отечества» филиалть руководителец Алексей Герасименко азсь благодарностень валхт республикань Оцюняти Артём Здуновонди и региональнай Правительствань вице-премьерти Галина Лотвановати сембе ширдень ширень кирдеманкса.
Благодарностень валхт филиалонь сотрудникнень лемс азсть спецоперациянь ветераттне Николай Сафьянников и Александр Рунков. Фондонь социальнай координаторхнень лезксснон вельде синь получасть техническяй реабилитациянь средстват, стане жа решандафтольхть кой-кодама кизефкст.
Спецоперациянь ветераттне примсихть активнай участия од ломаттнень патриотическяйста воспитандамаса. Синь—кемошинь и отвагань, видешинь и долгонь афкуксонь кепотькс. Ветераттне улендихть «Мужествань урокса», «Важнайть колга корхнемат» мероприятияса, мемориальнай доскань и «Героень партань» панжемань церемонияса. Тя работаса заняф СВО-нь 100 ветеран.
Отечествань Воинонь семьянь комитетть председателец Ольга Соболева азсь филиалонь сотрудникнеди спасибамань валхт сотрудничендаманкса.
Государственнай оцю казнет макссь МР-нь военнай комиссарть васенце заместителец Сергей Леухин. Мужестванкса, отваганкса и эсь прянь аф ужяльдеманкса Мужествань орденца (куломда меле) казьф Михаил Михайлович Киселёв. Казнесь максф тядянцты Наталья Борисовна Киселёвати.
Стане жа Мужествань орденца казьф Павел Александрович Гущин. Мужествань орденти (куломда меле) удостоверениясь максф тядянцты Елена Александровна Гущинати.
Мероприятиянь участникне шавф геройхнень лятфтазь минута кашт аф молезь ащезь.
Тяка жа шиня ульсь Россиянь Геройть, Мордовияса шачфть-касфть Давид Малыйкинонь портретонц мархта открыткань и почтовай конвертонь гашениянь торжественнай церемония. Эсонза примасть участия геройть мала ломаненза—тядяц, брадоц и сазороц.