Июльть мекольце шистонза Зубово-Полянскяй райононь эряйхне васьфтсть кафта илат—районть 94 кизонь топодеманц и Зубова Поляна посёлкать 343 кизонь топодеманц.
Пуромфненди Мордовия Республикань Оцюнять А.А.Здуновонь лемста поздравляндамань валхт азсь Мордовиянь Оцюнять и Мордовиянь Правительствать Администрацияснон Руководителенц аф лама пингс тевонзон тиендисна Андрей Александрович Богатов.
«Зубово-Полянскяй районть историяц кемоста сотф Мордовиять и марнек Россиять историяснон мархта. Тястонь эряйхне лама киза совестьс коре служайхть Отчизнати, тисазь семботь сонь виияфтоманц инкса. Мекольдень пингть районць ламода полафтсь цебярь шири: стройсевихть эрямань од кутт, Культурань кутт, идень сатт, петневихть китне. Сембось тя—Зубово-Полянскяй районть визитнай карточкац»,—мярьгсь А.А.Богатов.
Илатнень мархта сембонь поздравляндазень Зубово-Полянскяй райононь оцюнясь Владислав Алексеевич Поршин: «Ломаненьке—районть инь оцю козяшиц. Тинь асушинте, инициативанте, трудонь кельгоманте—марстонь сатфксоньке, сай пингоньке. Сюкпря теенть шачема крайти кельгоманкса, марстонь тефнень инкса пичедеманкса. Седи ваксста арьсян сембонди паваз, шумбраши, сатфкст оцю и ёмла тевсонт, вандыень шити кемама!»
Владислав Алексеевич лятфтазень и азсь спасибамань валхт Зубово-Полянскяй райононь оцюнятненди, конат эрь кодама кизоня путсть лама вий крайть касоманкса-виияманкса.
Койс коре, илать пингста казьфтольхть инь цебярьхне эсь профессиясост. Мордовия Республикань Почётнай грамотаса казьф ОМВД-нь дорожно-патрульнай службань инспекторсь А.В.Бабиков, Мордовия Республикань Оцюнять Благодарностьса—Зубово-Полянскяй больницянь врачсь-терапевтсь С.Н.Доина, курокстонь медицинскяй лезксонь максомань врачсь-терапевтсь С.М.Прошина, «Плайтерра» ЗАО-нь покодись А.И.Коблов и ламотне лиятне.
Районнай Культурань кудть маласа шиньберьф работасть эрь кодама площадкат, сценать лангса кайгсть Зубово-Полянскяй райононь инь цебярь коллектифнень моросна. Сашендсть артистт Саранскяйста Мордовскяй государственнай филармонияста. Ламонцнень салазень мяльснон «DENTRO» духовой инструментонь оркестрать выступленияц.
Райононь сембе поселениятне анокласть мокшень пачат, поза, пярякат, калонь и сиволень ярхцамбяльхть. Эрь азоравась пара мяльса каванязень илас саф инжихнень.
Библиотекарьхне няфтсть художественнай и публицистическяй литературань мялень салай выставкат. Инь ёмла инжихненди работась аттракцион мархта идень ошкя.
О.Белкина.