БЛАГОВЕЩЕНЬГЯСЬ

7 апрельста православнай ломаттнень оцю иласна—Благовещеньгясь.
Галлилейскяй Назарет ошса эрясь Дева Мариясь. Мзярда теенза топодсь кемнилие киза, храму сяда тов лядомс ашель кода. Священникне максозь сонь Иосиф старецти—Мариять ичкоздень раднянцты. Иосиф плотниколь, эрясь аф козяста. Дева Мариясь пялонза улемста сёрмадсь сюреса, сташендсь щапт, лувондсь священнай книгат и озондсь Шкайти. Весть, Священнай Писаниять морафтомста, эвондась теенза Архангел Гавриил и пачфтсь куля, што стирсь курок арай тядякс—шачи цёрац.
—Тят пеле, Мария!—мярьгсь Архангелсь.—Тонь кочканзе Шкабавазсь. Цёрацень лемдьсак Иисусокс. Сон ули Шкаень цёракс.
Ня валхнень кулемда меле Мария визделгодсь и кизефтсь: «Кода аран тядякс, кда мон стирян?»
Гавриил отвечась: «Святой Духсь валги лангозт».
Тянь каршес Дева Мария мярьгсь: «Мон—Шкайть ломанецан, кода мярьги—стане катк и ули».
Эстокиге Шкаень кучфсь тусь ваксстонза.
Тя событиясь эстоньбере ушедсь лемневома Благовещеньгякс. Сон фалу уленди 7 апрельста.
Тя шиня поставайхненди мярьгондеви ярхцамс калда.