Иттнень кстиндамста мярьгондеви ванфнемс кой-кодама правилат, конат фкат пцтай сембе христианский религиятнень аса.
КИТ ТЕРНЕВИХТЬ
ТЯ ИЛАТИ
Церькаву лама ломаньда пуропнемс аш мезенди. Великай таинствать пингста синь кармайхть аньцек шорсема. Идть мархта улест крёстнай тядятне-алятне. Родной тядяти, а тяфта жа маластонь лия раднятненди, православиянь правилатнень коряс, кстиндамань обрядть пингста ащемс аф мярьгондеви.
МЕЗЬСА НАРЯЖАМС
ИДНЯТЬ
Идняти кстиндамань панарнясь аноклама аф крёстнайхненди, а тядятненди-алятненди. Сидеста уленди тяфтавок, што сонь тяда инголе кие-бди ни щашендозе (тядяц, бабац, бабанц тядяц и стак тов). Сембось, мезьса наряжасазь иднять, улеза акша тюссоннекс Панархнень сташендсазь кувакаста кружева мархта ляпе и шуваня котфста, а сонцень обрядть пингста эрявкстыхть од нуланя и нардама.
Оцюфненди кстиндафтомста аф обязательна щашендома акшеса, теест кондясти эрь-кодама щамсь.
КРЁСТНАЙ
ТЯДЯТНЕ-АЛЯТНЕ
Крёстнайкс аф эряви сявондемс лия ломатть, сяда пара, кда синь кочкавихть иднять аканзон-альняканзон или тядятнень-алятнень мала ялгаснон ёткста.
Крёстнайхнень лангса ащи оцю ответственность, васендакиге, иттнень духовнай ширдень воспитанияснон инкса. Сяс теест фалу улема маласа.
Мяляфтома, што крёстнайкс аф сявондевихть мирттне-рьвятне, или ся од ломаттне, конат арьсекшнихть рьвяямс. Тяфтама семьятне аф получсихть церькавса бславама. Тяда башка, крёстнайхненди эстеест улема кстиндафокс.
Кстиндамань обрядть пингста, кона моли частта ламос, стирнять кирдьсы крёстнай тядясь, а цёранять—крёстнай алясь.
Крёстнайхненди фалу заботендама крестникснон колга. Мзярс сон ёмланя, кеняртьфнема казнеса-мезьса. Но материальнай ширдень лезкссь обязанностезост аф сувси. Кстиндамда инголе, кода крёстнайхненди, стане и тядятненди-алятненди эряви споведовандафтомс и прьхчещандафтомс.
МЕЗЕ АНОКЛАМС ШРА ЛАНГС
Церковнай обрядта меле крёстнай тядятне-алятне и сембе мала раднятне терневихть шра ваксс. Атяньке-бабаньке тя илати аноклакшнесть эсь лацонь обрядовай ярхцамбяльхть. Васендакиге, пицесть розень пярякат, конат казендевсть идень бабатненди (поветуха) и порендевсть лям мархта. А синць идень бабатне каннесть мархтост ям и мишендезь инжихненди. Ямть инкса инь оцю питнеть макссезе крёсналясь, теенза и сатнесь «казнесь». Сон лазондозе сяканять шра ужети, а меле пуромфне сивондезь ямть. Тяни тя обуцясь полафтсь и сяканясь кармась пяшкотькшневома всякай ламбамда, конфеткада, печенияда и стак тов.