Аф сембе ломаттне эряйхть прябалафтома, сяс теест эрявксни лезкс. Кинь аф сатни ярмакоц, кинь ашесть ляда мала ломаненза, конат ванольхть мельганза, а кие сась Мордовияв ширде и веши тяни эстеенза од работама васта. Павазонди, улихть ляпе седи ломатть, конат оцю мяльса венепнесазь лездыень кядьснон.
Мордовияса аф озадонь седихть ащихне 2008 кизоня тисть православнай Од ломанень союзть видеса «Доброделание» организация.
Сонь участниконза лемнесазь эсь пряснон доброволецокс. Тняра кизоста синь лездсть пяк и пяк лама ломаненди аф аньцек Саранскяйса, но и марнек Мордовияса.
«Доброделание» организацияти сувсихне лезнихть кудфтома ломаттненди, беженецненди, инвалиттненди, эряфкшуфненди, лафчста обеспечендафненди и лиятненди. Сидеста якайхть идень кудга, эряфкшу ломанень пансионаттнень эзга, примсихть участия ламоц проектса, конатнень ёткс сувсихть «Павазу ши», «Лямбе Роштува», «Аноклак идцень школав» и лиятне. Организациять ули гуманитарнай складоц, кона работай эрь вержиста и ёткшиста 11 частста сявомок 14 частти молемс.
Азома сявок, што доброволецнень финансированиясна кодамовок аш. Лезкссь кочксеви ся ярмакнень лангс, конатнень макссесазь аф озадонь седихть ащи ломаттне.
Доброволецнень тевсна содафт ламотненди. Саранскяй и Мордовскяй Митрополитсь Владыкась Зиновий аф весть казендезе организациять Благодарственнай сёрмаса. Нинге сон казьф «Флагман добрых дел» конкурсть итогонзон коряс: «Доброделаниясь» сяськсь «Флагман добрых дел Республики Мордовия» номинацияса.
Эсь тевснон колга доброволецне пара мяльса пачфнихть интернетса, вятихть группат ВКонтакте, а нинге Телеграм и Вайбер мессенджерхнень эса.
Организациять руководителец Жанна Мишанина пара мяльса азондсь организациять тевонзон квалма.
Кочкаф ярмакнень лангс синь рамсихть ашуфненди ярхцамбяльхть, медикаментт, щапт, а кой-коста лезнихть тя или тона ломанти пчксемань тевса. Кепотьксонди, аф кунара Дмитрий Р.-сь повсь ДТП-с, пяк токсевсь. Тифтольхть эрявикс операцият, массашт. Но Дмитриенди эряви ётамс реабилитация. «Доброделаниясь» ашезь ляда ширеса и доброволецне кочкасть аляти 65228 цалковай.
Аф кунара доброволецне ушедозь «Лямбе Роштува» акциять, кона уленди эрь кизоня. Организациясь кочкась кудфтома ломаттненди лямбе щапт: курткат, свитерхт, носокт, васьть и стак тов.
Ульцяса азорондай тялось, улендихть цят! моли якшапт и теест синь пяк эрявихть. Тя тевса ули кода примамс участия сембонди, кинь мялец. Сатомшка кандомс лямбе щапт гуманитарнай складу.
Моли Роштувань постсь и тя пингть пара тефт тиендемат сядовок сидеста. ВКонтакте соцсетьса «Доброделаниять» ули группац, коса азфт контакттне и реквизиттне, коза ули кода ётафтомс ярмак. И кода сёрматф Матфеень эзда Евангелияса: «Кодама пшкядема ломаттнень эзда учат, тяфта пшкятькшнек теест тонць».