ась сатозе васенце вастть «Кожаный мяч» од футболистонь Всероссийскяй пялькстомать финалсонза, «Колосок» велень лигать эса (2009-2010 кизотнень шачф цёранятнень ёткса). Пялькстоматне ётафтовсть Ессентуки ошса 16 июльста сявомок 23 июльти молемс. Сембоц пуромкшнесь странань региоттнень эзда 16 команда. Белозерьянь футболисттне тяда инголе лац няфтезь пряснон республикаса. Синь арасть сяськикс велень 88 командать ёткса. А меле сяськсть и марнек Россиянь пялькстомаса. Мекольце матчса Мордовиянь цёратне васетькшнесть Краснодаронь футболисттнень мархта и сяськсть 3:0 счётса. Тяда башка, футболистоньке Ильдар Нугаев, кона шавсь 11 гол, арась турниронь инь цебярь бомбардиркс, а Ибрахим Юмаев—инь цебярь вратарькс.
26 июльста «Мордовия Арена» стадионца ётафтфоль сяськихнень лемс ила. Цёратнень поздравляндазь МР-нь спортонь и од ломанень политикань министрсь Александр Савилов, Ромодановскяй райононь оцюнясь Сергей Ведяшкин, МР-нь футболонь Федерациять президентоц Александр Егоров, Мордовиянь татаронь старейшинань Советть председателец Шамиль Бикмаев и Белозерье велень оцюнясь Рясим Салихов. Сембе синь азсть лямбе валхт од спортсметтненди. Лятфнезь, кода таколдозь ванцть эрь матчть мельге. Сембе эсь ширдест казсть од чемпиоттненди казнет, конат лездыхть сяда товолдонь тренировкатнень эса. Тяда башка, МР-нь Спортонь министерствать эзда Благодарностть максфтольхть Ромодановскяй райононь оцюняти С.Ведяшкинонди, Белозерье велень школань директорти Э.Киреевати, командань тренерти Н.Янгличевонди, физкультурань учительти А.Ахмяровонди.
«Колосок» велень лигать эса сяськоманкса эрь налхкити максфоль II спортивнай разрядсь.
Илась поладовсь экскурсияса «Мордовия Арена» стадионть эзга. Цёранятне ванозь спортонь музейть и налхксть стадиононь паксять лангса.
И.ФАДЕЕВА.