20 июньцта сявомок 24 июнти молемс Мордовиять столицаса, Саранскяйса, ётафтовихть «Газпром» ПАО-нь дочерняй обществатнень и организациятнень ёткса пожарно-спасательнай спортть коряс пялькстомат. Эсост примай участия 26 команда Россиянь эрь кодама регионцта. Сембоц—300 лама спортсмен. Колма шиста синь кармайхть няфнемост маштомошиснон «Старт» стадионца.
Саранскяйса 21 июньцта пялькстоматнень торжественнайста панжемасост примась участия Мордовиянь Оцюнясь Артём Здунов.
«Пожарно-спасательнай спортсь—тя спортонь достойнай прикладной, команднай вид. Спортсметтне аф содасазь, эвондайхть-аф эряфса ситуацият, мзярда сави нолдамс тевс тренировкатнень пингста получаф содамошитнень. Катк тяфтамот аф кармайхть, но анокши эряви. Арьсян спортивнай пялькстомань участникненди сатфкст и катк сяськи инь виись»,—мярьгсь Мордовиянь руководительсь.
Республикань Оцюнясь стане жа ванозе выставкать, кона лемтьф пожарда араламати. Эсонза няфтьфт специальнай техническяй оборудованиясь, спецщапне и техникась.
Пожарно-спасательнай спортть коряс пялькстоматне—тя чрезвычайнай ситуациянь условияса прянь вятемати работникнень профессиональнай анокшиснон ваномац. Пялькстоматнень задачасна—пожархнень матомаснонды дочерняй обществань аварийно-спасательнай подразделениятнень профессиональнай опытснонды, маштомошиснонды и анокшиснонды оценкань максомась.