Июльста ушедыхть «Мордовскяй футбольнай лигать» пялькстоманза

11 июльста «Мордовия-Арена» стадионца ётафтовсь «Мордовскяй футбольнай лигать» жеребьёвкац. Пялькстоматнень арьсекшневи ётафтомс июльть песта.
Турнирса примай участия республикань предприятиятнень и организациятнень эзда 18 команда. Синь явовсть 2 подгруппава—«Запад» и «Восток». Колмоце вастть инкса матчсь и финальнай матчсь ётафтовихть «Мордовия-Аренаса».
Ламонцне командатнень-участницатнень эзда тяни ни лездыхть идень футбольнай командатненди. Тя инь главнайсь. Республикань бизнесть и идень футболть ёткса сотксонь кирдемась максси цебярь толхмадема вииямати, мезсь канды юношескяй командатненди сяда лама сяськома сай пингть»,—мярьгсь Мордовиянь футболонь Федерациянь Президентсь Александр Егоров.
Лигась арай дополнениякс футболть коряс Мордовиянь чемпионатти массовай и любительскяй футболть виияфтоманкса. Турнирнай пялькстоматнень ётафтомста кармай нолявома тевс 2018 кизонь футболть коряс Миронь чемпионатть наследияц—марнек спортивнай инфраструктурась и футбольнай паксятне, конат строяфтольхть мундиальти.
Кода инголи азозе Мордовиянь Оцюнясь Артём Здунов, лигать пуроптомаса главнай цельсь—тиемс республикаса футболть афкуксонь «народнайкс», содафокс и массовай спортонь видкс. Башка мяль сон шарфтсь матчта инголе мазы, мялень салай культурнай программать анокламанц лангс—тиендемс семейнай праздникт, благотворительнай ярмаркат, презентацият, волонтёронь и од ломанень организациянь мероприятият, народно-художественнай промыслань, сувенирнай продукциянь выставкат.