Казезь инь цебярь спортсметтнень и тренерхнень

9 августста Республикань Кудса чествовандазь инь цебярь спортсметтнень, физическяй культурань и спортонь работникнень.
Мордовиянь Оцюнять Артём Здуновонь лемста торжественнай мероприятиянь участникнень поздравляндазень МР-нь Правительствань Председательть васенце заместителец Галина Лотванова. Сон азсь благодарностень валхт отраслянь сембе представительхненди спортть виияфтомаса оцю путксонкса. Китькстазе, што синь вийснон вельде регионць сатсь оцю сатфкст массовай спортса и атлетонь анокламаса.
«Минь главнай задачаньке—профессиональнай спортсменонь анокламась. Ламоцне эздост няфнихть ни оцю результатт. Ня показательхне тейнек кирдемат контроль ала и цебярьгофтомат спортивнай объекттне. Нолдасаськ тевс сембе ресурснень адаптивнай спортть виияфтоманкса, СВО-нь ветераттнень мирнай эряфти мрдафтоманкса. Арьсекшнетяма панжемс реабилитационнай центра боевой действиянь ветераттненди. Башка мяль шарфневи семьятненди, вдь сембось ушеткшни семьяста»,—китькстазе Галина Лотванова.
Сон стане жа отмечазе, што эрявикс задачакс ащи спортивнай инфраструктурать строямац. «Эряйхненди оцю значенияц кудть ваксса спортса пря занцемась. Мордовия Республикась няфтезе эсь прянц стама территориякс, коса ули кода ётафнемс международнай и российскяй пялькстомат. Тернетядязь ванфтомс уликс темпть и сяда тов виияфнемс региононьконь спортивнай потенциалонц»,—поладозе Галина Лотванова.
Казьфнень ёткса—опыт мархта педагокт-тренерхт, асу од специалистт, физическяй культурань ветератт и оцю пялькстомань сяськихть. Физическяй культураса и спортса сатфксонкса «Заслуженный работник физической культуры и спорта РМ» почётнай лемсь максф ведьалдонь спортть коряс Мордовиянь главнай тренерти Татьяна Видяскинати и Темниковскяй детско-юношескяй спортивнай школань тренерти Николай Болдинонди.
Казнетнень спортсметтненди максозь Мордовиянь Правительствать Председателенц васенце заместителец Галина Лотванова и республикань спортонь министрсь Никита Ларьков.