Миннетне сатозь межрегиональнай пялькстомань казнетнень

Мордовия Республикать эзга Россиянь МЧС-нь Главнай управлениянь сборнай командась мрдась пожарно-спасательнай спортть коряс межрегиональнай пялькстомаста лама казне мархта.
Ниле шит Киров ошса пцтай 400 спортсменць пялькстсть инь вииень лемть инкса. Мордовиянь спортсметтне няфтсть пяк цебярь результатт.
Алятнень ёткса штурмовой куцеманява куцемаса 13,05 секунда результат мархта I вастть занязе Илья Киселев. Теенза удалась «аськолдамс» эсь рекордонц вельф и ладямс рекорд республикать эзга.
II вастть занязе Виктор Король—результатоц 13,76 секунда. Никита Дуденков «Стометровая полоса» дисциплинаса старшай возрастной группаса арась лидеркс 16,04 секунда результат мархта. Арина Хворысткина «Штурмовая лестница» дисциплинаса юниоркатнень ёткса старшай возрастной группаса 7,75 секунда результат мархта занязе II вастть и арась сяськикс «Полоса препятствий» дисциплинаса 17,25 секунда результатса. Арина Урмашкина младшай возрастной группаса занязе III вастть «Полоса препятствий» дисциплинаса 17,27 результат мархта.
Комплекснай зачётса Мордовиянь командась занязе 6 вастть и кочкафоль Российскяй Федерациянь Геройть В.М.Максимчуконь мяляфтоманкса Россиянь МЧС-нь Всероссийскяй пялькстоматнень финалозост.