Мекольдень кизотнень пяк лама тиендеви профессиональнай спортть виияфтоманкса. Цебярь кепотьксокс тя тевса ащи и инфраструктурась. Ули коса ётафнемс занятият, кочксемс вийхть. Кда корхтамс футболть колга, то Н.П.Огарёвонь лемса Мордовскяй госуниверситетонь Футбольнай клубсь шумордазе эсь сезононц НСФЛ-са аф ёмла сатфкс мархта.
2023 кизось арась сембе ширде удалафокс «МГУ-Талина» клубти. Кизонда ульсть «Кубок Регионов» РФС-ть эгиданц ала пялькстомат. Огарёвецне лац няфтезь эсь пряснон: групповой этапса сяськсть сембе налхкоматнень эса и лиссть плей-оффти, коса пачкодсть финалти. Турниронь инь оцю матчсь ётафтовсь «Мордовия Аренаса». Ужяль, кудса «МГУ-Талинати» ашезь сяськов «Строительсь», но сон сатозень сиянь медальхнень.
Тяда башка, огарёвецне налхксть Мордовиянь чемпионатса и Кубкаса и кафцьке турнирхнень эса сатозь зрнянь медальхнень. Меколи ульсь суперкубкань матчсь.
огарёвецне вийснон ламошкаснон путозь Студенческяй лигати. «МГУ-Талина» клубсь налхксь Б-группаса, коса ульсь и М.Е.Евсевьевонь лемса МГПУ-ть командац.
Васенце сезонць ушедсь лац. Мордовскяй госуниверситетонь футболисттне мини-турнирса фалу мольсть инголе. Но клубти ашезь сатне составть полафтомац, ульсть травмат, а ортаса сашендовсь налхкомс Денис Кахутинонди, кона фалу налхки защитниконь позицияса. Сяс ушедсь очкань юмафнемась.
Омбоце сезонць ушедсь НСФЛ-ть матчензон эзда, конат ульсть «Мордовия Аренаса». Налхксть МГУ-нь, МГПУ-нь, КалмГУ-нь и АМВД ДНР-нь командатне.
Огарёвецне сатозь квалификациять и ульсь кода А-группав лядомс васенце вастса. Синь конкурентсна—Казаньцта ПГУФКСИТ-сь.
А-группав лисемась—тя оцю сатфкс. Тоса налхкихть студенческяй инь вии командатне, конатнень инкса, уленди, налхкихть футболисттне Российскяй Премьер лигаста и футбольнай Академияста. Кепотьксонди, эсь пингстонза тоса налхксь Матвей Сафонов—«Краснодар» клубть вратарец.
Арьсетяма огарёвецненди лацкас анокламс сай кизонь сезонти и няфтемс пря виихнень ёткса.
Илья ПЕРВОЙКИН.