Порапань содаф спортсметтне

Аф кунара Мордовияса келиста отмечазь Физкультурниконь шить. Ульсть спортивнай оцю пялькстомат. Инь достойнайхненди максфтольхть государственнай казнет.
Мялезе азондомс спортонь ветераттнень колга, конат кеподезь боксть оцю серес Ковылкинскяй районца. Анокласть содаф лама спортсменда республикати, странати. Корхтамась моли В.В.Чукаровонь колга. Ётай веконь кафксогемонце кизотнень сонь лемоц Ковылкинскяй районца содафоль пяк цебярьста. Мзярда тонафнесь 15№ СПТУ-са, оцю мяльса якась боксонь секцияс. Ашезь ноля фкявок тренировка. Од цёрать мархта покодсть тяфтама содаф тренерхне, кода А.И.Тюрев, К.Н.Соколов, Ю.П.Глазков, В.И.Канаев. Васенце оцю сатфкссь В.В.Чукаровонди сась республиканскяй пялькстомаса, кона ётафтовсь 1982 кизоня Рузаевкаса А.П.Байкузовонь призонзон инкса. Тяса сон занязе омбоце вастть. Илештень кятть Василий Васильевич кярьмодсь Порапань школать видеса боксонь секциять панжема. Эста кржа кие теенза верондась. Но тевоц од цёрать удалась. Совхозса покодемда меле сон эрь илядня эряскодсь школав, коса учезь воспитанниконза. И аф аньцек Порапаста, но и Вечкеня велеста.
Чукаровонь ученикокс лувондсы эсь прянц и Виктор Илькаев, кона пцтай ниле кизот якась боксонь секцияс. Оцю славась теенза сась 1984 кизоня. Эста сонь сувафтозь Мордовиянь сборнайти. 1984 кизоня Смоленскяйса зональнай пялькстомаса занязе омбоце вастть и сувась Россиянь первенствань финалти. А ковда меле Туапсе ошса Россиянь пялькстомаса занязе колмоце вастть. Сон Порапа велень школаса стане жа вятсь боксонь секция. Служась армияса пограничникокс. Армияда меле мрдась куду, покодсь Ковылкинань ДЮСШ-са тренеркс, Порапа велень поселенияса оцюнякс. Но спортть мзярдовок ашезе кадонда. Вятсь боксонь секция, касфтсь содаф лама спортсмен.
Василий Илькаев.