Пялькстоматне лемдевсть Михаил Девятаевонди

Мордовиясь кафта шис арсесь греко-римскяй бароцямань центракс—республикасонк ётафтовсть Советскяй Союзонь Геройть Михаил Девятаевонь лемса юниорхнень ёткса спортивнай бароцямать коряс Всероссийскяй пялькстомат. Турнирть лама кизонь историяц—васенцеда сонь медалензон инкса спортсметтне пялькстсть ичкоздень 1967 кизоня. Кизоста кизос келемкшни сонь географияц. Тядде пялькстомас пуромкшнесь пцтай 200 спортсмен странань 20 ошста.
23 ноябрьста всероссийскяй турнирти ушеткс путсть Мордовиянь Оцюнясь Артём Здунов и колмонь-крда олимпийскяй чемпионць и Россиянь спортонь Заслуженнай мастерсь Александр Карелин.
Пялькстоматнень панжемда инголе российскяй борецсь и пялькстомань почётнай инжись ётафтсь мастер-класс од спортсметтненди.
Артём Здунов спасибась Александр Карелинонди турнирса участвовандаманкса и юношескяй спортть ширенц кирдеманкса.
«Эрь спортсменць, эрь геройсь, эрь чемпионць ушеткшнезе эсь карьеранц тянь лаца аф оцю чемпионатста. Надиян, ня пялькстоматнень вельде минь панчтама од лепт,—приветствовандазень участникнень и инжихнень республикань руководительсь.—Минь турнироньконди максф легендать—Михаил Петрович Девятаевонь, Мордовияса шачфть-касфть лемоц. Михаил Петрович арась геройкс нинге шиса улемстонза, тиемок 1945 кизоня аф тиевить. И мзярда турнирти пяле векта лама ни, ули кода азомс, што сон кармай улема фалу».
«Михаил Петрович Девятаев—уникальнай ломань, Советскяй Союзонь Герой. Сон тись подвиг—ворьгодсь фашистскяй пленцта. Тя турнирсь—сонь отваганцты честень путома, колганза мялямть ванфтомац. Спасибан Мордовиянь руководствати, мес турнирсь ванфневи. Кеман, тячиень пялькстоматне няфтьсазь спортонь тя видть сембе мазышинц»,—мярьгсь Александр Карелин.
Греко-римскяй бароцямась спортонь аф аньцек базовай, но и республикань эряйхненди фкя инь кельгови видсь. Ули кода азомс, што классическяй бароцямань мордовскяй школась—фкя инь цебярсь странаса и мирса. Спортсметтне, конат воспитандафт республикаса, арсихть олимпийскяй налхкомань, миронь и Европань чемпионатонь сяськикс и призёркс.