Пялькстсть аграрийхне

Краснослободскяй райононь оцюнясь И.П.Волков эсь работасонза васенце вастс путнесы ломаттнень шумбрашиснон. Мзярда сон уленди велень хозяйствань и лия предприятиятнень эса, сон фалу корхни сянь квалма, што сяда сиденяста эряви улендемс спортзалса, ётафнемс спортивнай пялькстомат, налхкомат. А тянкса тифт районца сембе условиятне. И райононь вятись аф ёрясыне кафта пяли эсь валонзон. Эсь ломанькс лувондови спортзалса сонць. Тякоть вешсы и руководительхнень кядьста.
Аф кунара идень спортонь школаса ётась велень хозяйствань предприятиянь командатнень ёткса волейболса пялькстома, кона лемтьфоль велень хозяйствань и переработкань тиенди предприятиянь работниконь шити. Спортонь турнирса примасть участия вете командат. Синь лемозост поздравлениянь валхт азсть Краснослободскяй райононь оцюнясь И.П.Волков, велень хозяйствань отделонь вятись П.М.Федосеев, ДЮСШ-нь директорсь И.Н.Карпушкин, лиятне.
Тя турнирса примасть участия «Новокярьгинское» ООО-нь, аграрнай техникумонь, «Свободный труд» СХАП-нь, велень хозяйствань управлениянь, ошень ветстанциянь командатне. А сяськикс лиссь «Свободный труд» СХАП-нь командась, ков сувсесть Евгений Бардин, Вадим Кузьмин, Сергей Сяткин, Марина Сяткина, Сергей Кочетков, Марина Фролова, Александр Мотин, Татьяна Рыкалина, Инна Гулина. Пялькстоматнень пингста няевсь, што командась аф кальдявста аноклаф.
Казнефтома кивок ашезь ляда.