Саранскяйса ётафтовсть спидвейть коряс пялькстомат

11 январьста Саранскяйса панжевсть спидвейть коряс Всероссийскяй пялькстоматне. Эсост примасть участия 16 кизоста сявомок 21 кизосотненди молемс 13 спортсмен, вететне аралазь Мордовиять честенц. Нят: Владислав Захаров, Роман Барабошкин, Егор Парамонов, Руслан Смирнов и Дмитрий Велькин.
Пялькстоматнень панжезь МР-нь спортонь министрсь Никита Ларьков, Россиянь мотоциклетнай федерациянь официальнай представительсь, эйть ланга мотогонкатнень коряс МР-нь Трековай комиссиянь членць, пялькстоматнень директорсна Алексей Рыбаков и СВО-нь ветеранць Александр Кузин.
«Кизоть минь панчсаськ мазыста! Ужяленди, погодась аф кодама, но эйсь анок, сяс спортонь илати улемс! Спортсметтненди арьсян сяськома»,—азозе Никита Ларьков. Сон стане жа отмечазе, што кельгома спидвейсь Саранскяйса одукс ушедсь ётафневома МР-нь Оцюнять Артём Здуновонь инициативанц коряс.
Инь од спортсменкс ульсь Свердловскяй областень Каменск-Уральский ошста Руслан Абзалов. СВО-нь ветеранць Александр Кузин арьсесь спортсметтненди улемс виикс, няфтемс цебярь результатт и профессионализма.
Васенце шинь итокнень коряс колма мотогонщикне Артём Меньшиков, Роман Барабошкин и Семён Бархатов кочкасть вейхксонь очка. Егор Парамонов—сисем очкат.
Пялькстомань омбоце шись, 12 январсь, лемтьфоль спидвейть ушедыенцты—Владимир Карнеевонди. Сяс од ломаттне пялькстсть аф аньцек Всероссийскяй пялькстомань кубкать, но и Владимир Ивановичень кубканц инкса.
Лувомок кафта шинь очкатнень, содавсь, што Роман Барабошкин и Семён Бархатов кочкасть 18 очкань. Сяськить содаманкса спортсметтненди эрявсь пялькстомс заездса. Роман ётазе Семёнонь. Тяфта, эйть лангса мотогонкатнень коряс Всероссийскяй пялькстомань сяськикс арась Мордовияста Роман Барабошкин. Омбоце вастть сатозе Иркутскяйста Семён Бархатов, а колмоцеть—стане жа Иркутскяйста Илья Кривоножко.
—Тя сяськомать мон лемдьса алязти. Вдь самай сон вятемань спортти и ламоть тиендьсы сянкса, штоба мон сатнелень тяфтама сатфкст. Виденцян, ашень арьсе васенце вастть колга. Монь пяк пара мялезон,—мярьгсь Роман Барабошкин.
А Владимир Карнеевонь кубканц сатозе Владислав Захаров (10 очкат).