Сатфкссна няевихть

Спортса оцю сатфксса васьфтезь эсь профессиональнай иласнон, Физкультурниконь шить, Атюрьевскяй райононь идень спортонь школань тренерхне, средняй общеобразовательнай школань физвоспитаниянь учительхне. Районца, республикаса аш стама cпортивнай пялькстома, коса ба синь афольхть прима участия. Инь содаф и мяляфтови пялькстоматне лемтьфтольхть Советскяй Союзонь Геройхненди Е.Г.Акиняевонди, А.Г.Махровонди, Ф.Ф.Коноваловонди, Социалистическяй трудонь Геройти Н.С.Маресинати. Спортивнай лама пялькстомада ётафтфоль Афганскяй, Чеченскяй войнань, СВО-нь участникнень лемс. Синь эшкссост кяшф лама ломанень труд. Кепотьксонди, эрь кизоня ётафневихть ласькомать, вишкста якамать коряс пялькстомат Социалистическяй трудонь Геройть Н.С.Маресинать призонзон инкса. Эсост примсихть участия 200-та лама спортсмен Саранскяйста, Торбееваста, Зубово-Полянскяй, Атюрьевскяй и лия райоттнень эзда. Крхтаж велень поселениянь оцюнясь В.И.Сунгаев лятфнесы Надежда Семёновнань биографиянц. А шачсь и кассь сон Рузонь Козловка аф оцю веленяса. Трудендакшнесь Ленинонь лемса колхозонь учань фермаса. Трудса оцю сатфксонкса и максфоль тя оцю почётнай лемсь.
Спортивнай оцю ила ётафневи и Советскяй Союзонь Геройть Е.Г.Акиняевонь лемс. Сонь анокламстонза аф кржа вий максси и Стрельникова велень поселениянь оцюнясь С.З.Кильдяев. Геройсь калмаф Стрельникова вели. Калмонц мельге ваныхть ветеранонь первичнай организациясь, конань вятьсы Л.А.Малютина, велень иттне.
Эрь кизоня спортивнай пялькстомат ётафневихть Крхтаж велеса браттнень Леванофнень призснон инкса. Николай Семёнович и Иван Семёнович эсь шачема-касома велень кельгихть. Фалу мяльса кирдьсазь велеряйснон, велеть прябаланзон, вийс коре лезнихть. Эрь кизоня Крхтажу пуромкшни лама спортсмен, политик, культурань работник. Морасть велеряйхненди Мордовиянь Заслуженнай артисттне Любовь Князькова, Галина Макшева, Нина Спиркина, мокшалясь, моронь морсись Гриша Петров, лиятне.
Эрь оцю илать эшксса кяшф лама тренеронь труд. Физкультурниконь ши карша лятфтасаськ синь лемснон. Нят И.И.Данин, И.И.Анисимов, М.Ф.Царёв, С.И.Маскайкин. Велень школатнень эса трудендайхть тевонь содай, козя опыт мархта физвоспитаниянь учительхть. Ламотнень эздост улихть почётнай званиясна. Нят Н.И.Бурнашкин, С.И.Маскайкин, А.С.Кашаев, Г.К.Савкин, А.Н.Шукшин, В.И.Гераськин. Синь анокласть лама спортсмен, республиканскяй пялькстомаса сяськи.
Илья ВЕШКИН.