Спидвейсь республикасонк виияфневи

Аш кодамовок таколдомат, што спидвейсь кемоста и лама пингс мрдась Мордовиять эряфс! Тядде Саранскяйса ётафтовсть ни команднай зачётса Россиянь Чемпионатонь высшай лигать васенце этапоц и Россиянь Кубкань высшай лигать васенце этапоц. 18 и 19 февральста «Старт» стадионць примазень Россиянь Чемпионатонь омбоце этапонь и Россиянь Кубкань омбоце этапонь команднай пялькстоматнень. Тя оцю кенярдема аф аньцек спортсметтненди, конат лемдезь эсь эряфснон эйть лангса мотогонкатненди, но и болельщикненди, конада республикасонк пяк лама.
Пялькстоматнень панжезь Мордовиянь Оцюнясь Артём Здунов и почётнай инжихне—Россиянь Заслуженнай мастерсь, Миронь кафксонь-крдань чемпионць и ледовай спидвейть историяса сембода титулованнай мотогонщиксь Кирилл Дрогалин, а стане жа Россиянь мотоциклетнай федерациянь официальнай представительсь Алексей Рыбаков.
«Минь сяда тов виияфнесаськ спидвейть — республиканьконди спортонь родной видть. Ульсь пинге, мзярда Россиянь сборнайсь фкя лацоннель Мордовиянь сборнайть мархта. Тейнек эряви мрдафтомс тя пингть и молемс сяда тов! Оцю сюкпря, што мархтонк тячи Кирилл Олегович Дрогалин, кона кандсь оцю слава Мордовияти»,—мярьгсь республикань руководительсь. Сонь валонзон трибунась васьфтезень кайги цяпамаса.
Кирилл Дрогалин поздравляндазень сембе болельщикнень и спортсметтнень афкуксонь илать—мокшэрзянь мастору спидвейть мрдаманц мархта.
Спидвеень кельгихненди стане жа пшкядсь Германиянь фкя инь титулованнай мотогонщиксь, миронь чемпионатонь личнай зачётса кафтонь-крдань сиянь призёрсь и нилень-крдань бронзань призёрсь Гюнтер Бауэр, кона несколька киза выступандакшнесь Мордовиять инкса: «Мон павазуван, мес спидвейсь мрдась Мордовияв, кона лама киза ульсь теенза мировой столицакс. Надиян, монь кармай возможностезе самс ошезонт и примамс участия гонкатнень эса цёразень мархта».
Мордовиять столицаса пялькстомаса примасть участия странань содаф мотоклубонь спортсметтне.