«Сяськихнень чемпионатсна»

22 декабрьста Мордовияса торжественнайста панчфоль «Сяськихнень чемпионатсна» идень всероссийскяй футбольнай фестивальть колмоце сезоноц. Мероприятияса примасть участия Мордовиянь Оцюнясь Артём Здунов и содаф российскяй футболисттне: советскяй футбольнай вратарсь, СССР-нь спортонь Заслуженнай мастерсь Ринат Дасаев, Россиянь спортонь Заслуженнай мастерсь, «Ветер добрых перемен» благотворительнай фондть васенце вице-президентоц Евгений Алдонин, спортонь Заслуженнай мастерсь, 2008 кизонь Европань чемпионатонь бронзовай призёрсь, 2004 кизонь Россиянь чемпионць Дмитрий Сычев, футболть коряс Россиянь колма-крдань чемпионць Георгий Щенников и «Ветер добрых перемен» благотворительнай фондть попечительскяй советонц председателец Денис Игнатов.
Чемпионатсь 2022 кизоста сявомок пуроптсь ни идень 144 команда, тя 2,5 тёжятть шаба Россиянь эрь-кодама регионцта. Мордовиянь олимпийскяй анокламань центрать футбольнай манежсонза тя шиня пуромкшнесь 160-да лама участник идень куттнень, лама идень семьятнень, эряфонь палас повф семьятнень эзда, СВО-нь участникнень шабасна, а стане жа лафча шумбраши мархта иттне и, конешна, ваныхне и болельщикне.
«Приветствовандатядязь футболонь инь цебярь спортивнай иласа. Сюкпря «Ветер добрых перемен» благотворительнай фондти и Россиянь футбольнай союзти: сембода титулованнай спортсметтне, инь цебярьхне мирса—тячи Саранскяйсот. Поладсаськ сяда тов тя койть»,—мярьгсь Артём Здунов.
Фестивалень участникнень стане жа приветствовандазь пялькстомань оцю инжихне.
Правась ушедомс налхкомать сатовсь Саранскяйста кота кизоса Кирилл Морщагинонди. Цёранясь участвовандась «Мялень кузня» акцияса. Кириллонь мялецоль корхнемс футболонь тяшттнень мархта. Мордовиянь Оцюнясь, кона валхтозе кузнять лангста цёрокшть шаронц, пяшкодезе сонь мяленц.
Стане жа од футболисттненди аноклафоль пресс-конференция, конань ётафтозь содаф спортсметтне. А фестивальсь поладовсь конкурсса, автограф-сессияса, гала-матчса, коса сембе командатне пецек-пецек налхксть почётнай инжихнень командаснон мархта. А меле казьфтольхть турниронь сембе участникне.