Саранскяйса васенцеда ётафтовсь шайба мархта хоккейть коряс «РЖД» ОАО-ть и РОСПРОФЖЕЛ-ть Кубкасна. Колма шит, 25 октябрьста сявомок 27 октябрти молемс, сяськомать инкса пялькстсь 17 команда. Тядде поладсь од участник—Новороссиянь машина кинь командась.
27 октябрьста «Огарёв Арена» спортивнай комплексса кочкавсть призёрхне и сяськихне.
«Зрнянь» дивизионца инь цебярькс арась Приволжскяй машина кись, «сияннеса»—Новороссиянь машина кинь командась.
Каземань церемонияса примасть участия РОСПРОЖЕЛ-ть председателец Сергей Черногаев, Куйбышевскяй машина кить начальникоц Вячеслав Дмитриев, Мордовия Республикань Правительствать Председателенц васенце заместителец Игорь Фрейдин, «Локомотив» РФСО-ть генеральнай директороц Андрей Голдобин и 1984 кизонь Олимпийскяй чемпионць, Миронь 6-крдань чемпионць Василий Первухин.
«Приветствовандасайне сембе командатнень болельщикснон! Тя налхкомать прямой эфирса ванозь тинь коллеганте и, конешна, пяк таколдсть инксонт. Минь няеськ, кода кизоста кассь хоккеисттнень асушисна. И, конешна жа, сяськомась макссеви коль сяда и сяда стакаста. Арьсян сембе командатненди сатомс цельснон, конань синь путнесазь эсь инголест. Минь тисаськ семботь, штоба спортсь вииякшнель машина китнень лангса, и кеман, што сембе оцю сяськоматне нинге инголет»,—мярьгсь РОСПРОФЖЕЛ-ть председателец Сергей Черногаев.
«Инь цебярь защитниксь» лемть сатозе Андрей Алемасов (Дальневосточнай машина кись), «Инь цебярь вратарсь» номинацияса эсь казненц получазе Приволжскяй железнодорожниксь Арсен Сомов.
«Инь цебярь нападающайкс» арась Михаил Сорокин (Москувонь машина кись), а «Турниронь инь цебярь налхкикс»—Даниил Субботин (Приволжскяй машина кись).
Цёратне получасть спортонь Заслуженнай мастерть, Россиянь Хоккеень федерациять президентонц, РФ-нь Государственнай Думань депутатть Владислав Третьяконь автографонц мархта клюшкат!