«Мордовия Арена» стадионца 1 сентябрьста Артём Здунов аф формальнай обстановкаса васетькшнесь «Спартакиада сильнейших—2022» призёрхнень мархта. Васедемаса примасть участия Мордовияста пялькстомань сяськихне и призёрхне, МР-нь спортонь и од ломанень политикань министрсь Александр Савилов.
Лятфтасаськ, што кизонь спортонь виттнень коряс Всероссийскяй спартакиадать ётафтоманц колга решениять примазе Россиянь Президентсь, кона путсь задача касфтомс странаса турнирхнень лувксснон. Инь виихнень васенце Спартакиадасна ушедовсь 10 августста и мольфтеви 2 октябрти. Ётафневи сон 12 региононь спортивнай объекттнень эса. Пялькстоматнень эса примай участия 9 тёжяньда лама спортсмен и 4 тёжятть тренер и специалист.
«Монь аш спортивнай медальне, аньцек кда школаса тонафнемать пингста, но пяк кельгса спортть, инь пяк, команднайть. Пяк кельгсайне спортсметтнень—нят кеме воляшинь ломатть. Мялезель ба содамс эздонт сянь колга, кода тинь латцесасть тяни эсь спортивнай программантень, и мезьса теенть ули кода лездомс тейнек»,—пшкядсь приветствиянь валсонза спортсметтненди Мордовиянь Оцюнясь.
«А.В.Мишинонь спортивнайста бароцямань и дзюдонь олимпийскяй резервань Спортивнай школать» директороц Геннадий Атмакин азондсь греко-римскяй бароцямать коряс Мордовиянь сборнайть выступлениянц колга. Сон мярьгсь, што мордовскяй бароцяйхнень копилкаса разнай достоинствань медальхть, тяконь лувксса и зрнянь. «Командась выступандась «4» оценкас, но улель кода сатомс сяда оцю результатт. Тяни минь тиенттяма анализ итокненди»,—мярьгсь Геннадий Атмакин.
Мордовияста ВМХ-нь командась арась спартакиадаса марстонь командань результаттнень коряс васенцекс. Цебярь результатт няфтсть спортивнайста якамать коряс мордовскяй спортсметтне. 35 вайгяльбень кувалмоса дистанциять аватнень и алятнень марстонь ётамаса республикань спортсметтне няфтсть Россиянь од рекорд.
Васедемань участникне стане жа корхтасть 2023 кизоня спортивнайста якамать коряс Россиянь чемпионатть Мордовияса ётафтоманц колга.
«Мордовиянь сборнайсь няфтезе спартакиадаса прянц лац. И хуш минь улеме аф сембе спортонь виттнень эса, Мордовиясь занцесы 21-це вастть странань 81 субъектть ёткса участникнень лувксснон коряс. Медалень аф официальнай зачётть коряс шумордаф дисциплинатнень результатснон эзда няеви, минь сувсетяма 20 инь виихнень ёткс»,—азозе МР-нь спортонь и од ломанень политикань министрсь Александр Савилов.
МР-нь Оцюнясь поздравляндазень спортсметтнень медальхнень мархта и азсь спасиба сянкса, мес республикась достойнайста няфтезе прянц ня пялькстоматнень эса.