Ванфтода пря мошенникта

15 августста Мордовия Республикань пресс-центраса ётафтовсь «Безопасные счета—миф, которым пользуются мошенники» лем ала конференция. Эсонза примасть участия МВД-нь, национальнай банконь, сотовай связень безопасностень сотрудникне.
Кода отмечазе Мордовия Республикань МВД-нь Уголовнай розысконь управлениянь старшай оперуполномоченнайсь В.В.Ежиков, аньцек тяддень сисем ковста мошенникне васькафтсть 776 Мордовиянь эряй 260 миллионда лама цалковайс. Мошенникне кода аньцек аф азонкшнесазь эсь пряснон: и банконь сотрудникокс, и сотовай связень операторкс, и МВД-нь представителькс. Аф ваномок ётафтф оцю работать лангс, ломаттне сяка повондыхть мошенникнень килькшс, ётафнесазь ярмакснон «специальнай счётс». И мезсь пяк пичефти, ламоц васькафтфне аф сашендыхть лезксонкса полицияв. Полициянь сотрудникне старандайхть лездомс сембонди, апак ватт аф кадондыхть фкявок эняльдема, заявления. Кепотьксонди, июньцта Саранскяень фкя эряйсь ётафтсь мошенникнень счётс 500 тёжянь цалковай. МВД-нь сотрудникне кундазь мошенникть. Сон Татарстан Республикань эряй. Ярмакнень меки мрдафтсазь ломанти. Июльста Мордовиянь колма эряйхне мошенникнень счётс ётафтсть ниле миллионда лама цалковай. Синь стане жа кундафт. Мошенникне Татарстанонь и Пермскяй краень эряйхть.
Мялень салай лама информация азсь журналисттненди сотовай связень операторонь безопасностень службань руководительсь А.В.Любезнов. Сон отмечазе, што мошенникне аф удыхть, синь «аппетитсна» касыхть шиста шис. Эряви улемс анококс аф содаф гайфнематнень лангс. Кда анайхть кодамовок счётт или эняльдихть ётафтомс ярмакт «специальнай счётс, эстокиге путома трубкась. Аф эряви «налхсемс» мошенникнень мархта. Сидеста тя «налхксемась» пачфти кальдявонди.
Конференциянь темать коряс эсь мялензон-арьсеманзон азозень Мордовия Республикать эзга Национальнай банконь-отделениянь безопасностень отделонь оцюнясь А.М.Петров.
Кельгома лувиеньке! Ванфтода пря мошенникта, тяда повонда синь килькшезост.
Илья Вешкин.