Эряфонь шумбра койхне ульсть и ляткшнихть ламотненди эздонк васенце тевкс. Ламотне эрь шобдаваня тиендихть зарядка, лисендихть ульцяв ласькондема или ялга якама. А улихть стама ломатть, конат пуромкшнихть марс и шумбрашить ванфтоманц, кемокстаманц мархта сотф тефнень вятьсазь марстонь вийса. Тянди кепотьксокс ули кода азомс «Клуб активного долголетия» Мордовия Республикань эряфкшу кизонь ломанень ассоциациять, кона пуроптфоль 2008 кизоня. Ся пингста сявомок сонь васенце целец—эряфонь шумбра койхнень, культурно-досуговай тефнень виияфтомасна и содафокс тиемасна, шумбрашить кемокстамац. Ассоциациять участниконза пцтай фалу тиендьсазь тянь ару кожфса—тяфта синь петнесазь шумбрашиснон, кемокснесазь спортть мархта уликс соткснень. Тяниень пингть ассоциацияти сувси 210 ломань.
Тняра кизоста «Клуб активного долголетия» ассоциациясь лисендсь сяськикс Российскяй Федерациянь Президентть гражданскяй обществать виияфтоманц инкса Гранттнень макссемаснон коряс конкурсса, «ЗОЖ-нь» од направлениятне» номинацияса IPRA GWA региональнай партнерть коммуникациянь сфераса премиянь сяськикс, Елена и Геннадий Тимченкотнень Благотворительнай фондснон ширень кирдеманц вельде «Активное поколение» конкурсса сяськикс и стак тов.
«Клуб активного долголетия» Мордовия Республикань эряфкшу кизонь ломанень ассоциациять (нинге теенза мярьгихть «КЛАД» ассоциация) президентонц Е.Г.Лезинать валонзон коряс, ассоциациянь члеттне кочксевихть занятияс несколька вастова. Кепотьксонди, шобдавань зарядкась уленди Саранск ошень округонь Пролетарскяй райононь Культурань и ваймамань паркса и Саранскяйса А.С.Пушкинонь лемса Культурань и ваймамань паркса азф шитнень и часттнень. Колмоксть недяляти Спортонь ведень видонь Дворецса («Старт» РСТЦ-са») ётафневихть эряфкшу ломаттненди йогаса занятиятне, эзнятненди гимнастикась (сон уленди и «Мордовия» спорткомплексса). Кельгсазь эряфкшу ломаттне уендемаснон, сяс оцю мяльса сашендыхть Спортонь ведень видонь Дворецу и «Мордовия» спорткомплексу. Тяда башка, тяса ётнихть шра лангонь теннисть коряс занятият.
Ассоциациять улихть Кочкуроваса и Ардатовса филиалонза. «Кочкуровскяй» филиалса шобдавань зарядкась и скандинавскяй якамась ётафневихть Кочкурово велень «Юность» стадионца, эзнянь кемокстай и пчкафты гимнастикась и шра лангонь тенниссь—Национальнай культурань, народнай промыслань и ремеслань районнай центраса. Волейболса налхкома клубонь участникне сашендыхть Кочкуровскяй средняй школав. «Ардатовскяй» филиалса ётафневихть эзнянь пчкафты гимнастикат.
Но аф аньцек занятияса примсихть участия ассоциациянь члеттне. Синь аф ляткшнихть ширеса Саранскяйса, республикань райоттнень эса ётафневи спортивнай, эряфонь шумбра койхнень мархта сотф пуромкснень эзда.
Вов аньцек мекольцетне эздост. Июльть песта Кочкуровскяй районца Карнай эрьхкть маласа ётафтовсь «КЛАД» ассоциациять членонзон ёткса Шумбрашинь ши. Сяда тов синь примасть участия Саранск ошень округонь Пляжнай волейболть коряс чемпионатса, кона лемтьфоль Россиянь Военно-морской флотть шинцты. Пензенскяй областень Физическяй культурань и спортонь министерствать инициативанц коряс, «КЛАД» ассоциациянь члеттне тертьфтольхть «Активное долголетие» Межрегиональнай фестивальти, кона ётафтовсь 4-5 августста Пензаса. Тя фестивальть целец тяфтамоль—тиемс сяда содафокс эряфонь шумбра койхнень Пензенскяй областень и Мордовия Республикань 50+ ломаттнень ёткса. Участникне ульсть В.Г.Белинскяень лемса Культурань и ваймамань центральнай паркса тя фестивальть панжемаса, а меле ётасть 3 вайгяльбетнень малава скандинавскяй якамаса вирень паркова.
Августть васенце пялестонза Саранскяйса ульсь «Анок трудти и оборонати» Всероссийскяй физкультурно-оздоровительнай комплексть фестивалец. Пялькстоматненди участникокс арась 400 лама ломань республикать столицаста и райоттнень эзда. Ашесть ляда ширеса и «КЛАД» ассоциациять членонза Л.Будникова, Р.Мухаметзянов и Е.Лезина. Физкультурниконь шить карша, кона Россияса уленди августть омбоце ёткшистонза, Саранскяйса Экопаркса ётафтовсь зарядка Мордовия Республикань Оцюнять А.А.Здуновонь мархта. Шумордазе сонь ассоциациять старшай инструктороц Вера Саушкина, кона няфтсь ронгть шумбракс, эзнятнень и саттнень кемокс улемаснон коряс упражнениянь комплекс. Цебярь полатксокс Физкультурниконь шить мяльса кирдезь арасть спортивнай пуромксне Карнай эрьхкса.
«КЛАД» ассоциациять членонза фалу примсихть участия спортивнай пуромкснень эса. Синь кородозь малаткшнихть эсь шумбрашиснонды и ёрайхть фалу улемс виикс, эрьгавкс, мезть мархта няфнихть цебярь кепотькс од поколенияти. Тя няеви и ветераттнень «фкявок аськолкс аш кода тиемс фталу, фкявок аськолкс аш кода ащемс фкя вастса, а аньцек инголи и аньцек марса» девизснон и эрь шинь тевснон эзда.
Т.Альшина.