Аш ёфси нолашиц

М.Д.Терёшкинась—медицинань ветеран. Шачсь и кассь сон Атюрьевскяй райононь Бораж велеса. Тяса и трудендакшнесь медсестракс, пчкафнесь эсь велеряензон эса. Бораж велень эряйхне тянемс лятфнесазь сонь аньцек шнама валса. И ули мезенкса. Мария Дмитриевна ся ломаттнень эзда, кона ашезь машта кальдявста покодема. Сон улендсь эрь кудса, содазе велень эрь шабать, эрь атять и бабать. Эрти старандась максомс медицинскяй лезкс. Эстонь кизотнень велесь пяшксель ломаньда. Семьятне оцюфтольхть. Ульсть и ветень, и кемонень идь. Мария Дмитриевна кенерькшнесь улемс эрь кудса. Сяс тянемс ломаттне мяляфтьсазь сонь и лятфнесазь аньцек лямбе валса.
—А кальдявста сонь лятфтамс аш мезенкса,—корхтай велень хозяйствань ветеранць Т.Т.Кузьминова.—Сявомс хоть минь семьяньконь. Сон оцюволь. Мария Дмитриевна сашендсь ширезонк сидеста. Пчкафтсь эсонк, кода аньцек маштсь. Сонь кодямонза ломаньда тяни пяк кржа.
—Мон тожа ни аф од ломанян,—поладозе Т.К. Калабкина.—Мария Дмитриевна эрясь и покотькшнесь сельминголен. Ломанць пяк ответственнаель, тевонц тиендезе совестьс коре. Кода содаса, тянемс лядсь тяфтама жа трудонь кельгикс, сталмода аф пеликс.
Тяфта ни лиссь эряфса, што ламоц Бораж велень эряйхне тушендсть эряма Краснодарскяй краи. Тяфта мирденц куломда меле ётась тяза эряма Мордовиянь Заслуженнай учительсь А.С.Беляева. Мархтонза сявозень идензон, авозенц. Боражень основной общеобразовательнай школаса трудендакшнесь и Мария Дмитриевнань мирдец, Василий Иванович. Сон школаса вятьсь историянь, географиянь урокт. Василий Иванович Великай Отечественнай войнань ветераноль, казьфоль лама боевой орденца и медальса. Терёшкиттне шачфтсть и касфтсть вете итть. Лама уноктост и уноконь идьтост.
14 окятбрьста, Покравонь шиста, М.Д.Терёшкинати топодсь 100 киза. Коста аньцек ашезь получа поздравленият тя трудонь кельги мокшавась. Но сяка инь лямбе поздравлениятне ульсть шачема-касома уженястонза, Бораж велеста. Тяса Мария Дмитриевнань улихть раднянза, содафонза, ялганза. Хоть и эряй Краснодарскяй крайса, а сединек-ваймонек сяка Боражть мархта. Кода сонць корхтай, кизодонза лама ни. Саль вели да кизонза ни аф сят. Но аф ваномок мезеньге лангс, сонць пичефтьсы эсь прянц. И пиди-пани, и стай-кодай. А сай тундась, сембе перень тефне соннет. Аш Мария Дмитриевнань ёфси нолашиц.
Илья Вешкин.