17 декабрьста «Биохимик» заводса, кона сувси «Промомед» компаниянь группати, панжевсь оцю технология мархта таблеткань нолямань од цех.
Сонь панжемасонза примасть участия Россиянь здравоохранениянь министрть заместителец Сергей Глаголев, Федерациянь Советонь оборонать и безопасностть коряс Комитетть председателец Виктор Бондарев, Государственнай Думань здравоохранениять коряс Комитетть председателенц васенце заместителец Федот Тумусов, Мордовиянь Оцюнясь Артём Здунов, «Промомед» ГК-нь директоронь советть председателец Пётр Белый и Н.П.Огарёвонь лемса МГУ-нь ректорсь Дмитрий Глушко.
«Промомед» ГК-ть од производствац—фкясь инь тяниень пингоннесь Европаса.
Тяса кармайхть нолявома противовируснай, нестероиднай противовоспалительнай, гепаропротекторнай, сашень формаса препаратт.
Инжихне ванозь таблеткань анокламань, плёнкаса вельхтямань, сашень анокламань помещениятнень и упаковкань цехть.
Торжественнай церемониять пингста участникненди приветственнай вал мархта пшкядсь РФ-нь здравоохранениянь министрсь Михаил Мурашко: «Фармацевтическяй индустриясь эсь пингстонза ушедсь COVID-19 урмать каршес тюрема и нюрьхкяня пингста кярьмодсь препаратонь, конат араласть тёжятть ломанень эряф, ноляма. Мон надиян, што од производственнай площадкать российскяй фармацевтическяй производительхнень ёткс сувафтомац тисамазь минь эсь лангозонк надияйкс, тя арай Россияса здравоохранениять и фармацевтическяй отраслять виияфтомаса гарантиякс».
«Панчсемок тяфтама производстват, минь няфнесаськ марнек мирти, што Россияти ули кода арамс технологическяй ширде аф зависимайкс. Минь машттама эрявикс оборудованиянь ноляма, ломанень тонафнема, интеллектуальнай собственностть араламанц коряс кинь ётама. Минь ули ломаттнень эряфснон и аралафшиснон коряс марстонь тевоньке, покоттяма кода фкя команда. Тяни ни арьсетяма производствань сай стадиять, од инвестициятнень и рынкатнень колга»,—мярьгсь Артём Здунов. Сон стане жа азсь благодарностень валхт инжихненди Мордовиять ширенц кирдеманкса, «Промомед» компаниятнень группаснонды—сотрудничендаманкса.
Церемониять песта предприятиянь инь цебярь сотрудникне казьфтольхть Федерациянь Советонь оборонать и безопасностть коряс Комитетть Почётнай грамотанц, Мордовия Республикань Оцюнять благодарностенц мархта, а стане жа Государственнай Думань здравоохранениять коряс Комитетть Почётнай грамотаса.