Больницяса шнама ломатть

Торбеевань районнай больницяса трудендась и тянивок покоди содаф лама врачта, медсестрада, конат оцю букваса сёрмадозь эсь лемснон пчкафтома учреждениять историяс. Тяфтама ломанькс ульсь Л.А.Чарышкин. Сон хирурголь. Аралась лама ломанень эряф. Леонид Алексеевич лама киза трудендась главнай врачекс Атерень, Торбеевань районнай больницятнень эса. Мекольдень пингть вятсь приём Торбеевань районнай поликлиникаса. Медицинати макссь нильгемоньда лама киза. Содаф хирургть, мокшалять ломаттне тянемс лятфнесазь лямбе валса.
40-да лама киза макссь медицинати Н.И.Седова. Сон трудендась медсестракс терапевтическяй отделенияса. А сась тяза покодема Темникавонь медучилищать аделамда меле. Надежда Ивановнань семьяцка ащи кепотьксокс Торбеева посёлкаса. Мирденц Михаил Александровичень мархта касфтсть кафта итть. Александронди и Татьянати макссть цебярь образования, воспитания. Тяни синь эряйхть Москуса. Седофнень ниле уноксна, конат сидеста сашендыхть родительснон шачема-касома уженязост.
Лама киза покоди районнай больницяса В.А.Евдокимова. Сон стане жа медсестра.
Колмогемонень и сяда ламонь киза макссть медицинати А.Чугунова, Н.Волкова, Н.Кирдяшкина, С.Шлаева и лиятне. Синь араласть аф фкя ломанень эряф, кеподсть пильге лангс лама сяряди.
Илья Вешкин.