Денис Сяткин:«Мялезе лезнемс стака урматнень пчкафтомаса»

—Нинге школаса тонафнемста (ветеце или котоце класса) ёрань арамс врачекс. Тяни ни аф лятфтаса, мес сась прязон тяфтама мяль. Кати фильма кодамовок ванонь, кати эряфста седиень таколфты история кулень. Мала ломаннень ёткса фкявок врач эста ашель. Азса видеста, пингонь ётазь седисон эвондакшнесь таколдома: сафтови тейне или аф. Ломанень пчкафтомась—тевсь стака. Лама тонафнема, лама содама. Пади, кочкама лия, сяда тёждя ки? Но кирдине валнень, и вов тячи ни мон специалистан,—азозе мокшень цёрась Денис Сяткин.
Сай пингонь онкологсь шачсь-кассь Атерь велеса. Школаса тонафнемать аделамдонза меле, 2014 кизоня, поступась Н.П.Огарёвонь лемса МГУ-нь Медицинскяй институту, конань меля шумордазе. Тяни ётай ординатура непрерывнай профессиональнай образованияниянь Российскяй медицинскяй академияса Москуса. Н.Н.Блохинонь лемса онкологиянь национальнай медицинскяй исследовательскяй центраса Денис пчкафни пациентт, лезни операциятнень пингста, тонафни работай ялганзон эзда.
—Васенце семестрать мон улень ся отделенияса, коса пчкафневихть прянь и сялдазонь онкологиясь. Омбоцеста—гематологияса. Эряви азомс, Н.Н.Блохинонь лемса центраса таргозьфнень пчкафнеманкса нолявихть тевс тяниень пингонь сембе од технологиятне, лекарстватне. Врачне сембе вийса лезнихть сярядихненди. Аньцек пяк ламось ащи синцень пациенттнень эзда. Ломаттне, а сембода пяк велеряйхне, сидеста сашендыхть лезксонкса эста ни, мзярда тефне ёфсикс кальдяфт,—мярьгсь Денис.
Од докторсь тернесыне ломаттнень аф тарксемс пингть и кда эвондась ронгса кодама-бди покольня, эстокиге няфтемс пря специалистонди.
—Велень ломаттне, а сембода пяк алятне, ашесть тонада тянь колга корхнемс, пеняцякшнемс шумбрашиснон лангс. Тя аф пара. Нинге весть сембонди лятфтаса—врачнень эзда виздемс аф эряви. Рана муф урмать сяда тёждя пчкафтомац,—азозе Денис Николаевич.
Од специалистть валонзон коряс, оцю прябалакс ащи ся, што ломаттне, ётамок пчкафтомань курсть, операциять, ков-бди юмсихть. Лотксихть няфнемда пря врачненди, аф массихть аналист, аф ётнихть обследования. А вдь уленди—урмась мртци и ломанть эряфонц ванфтомс аф удалси.
Инголе Денисонь ординатураса тонафнемань нинге фкя киза, а меле сон ёрай самс покодема Мордовияв, Зубово-Полянскяй районнай больницяв. Тоса аш врач-онколог и республикань Здравоохранениянь министерствась кемокстась целевой контракт од специалистть мархта.
—Мес кочкайне онкологонь специализациять? Сяс мес тя пелькс урмась нинге педа-пес апак содак, лама мезе тонафнема, штоба араламс эздонза ломаттнень. И монь мялезе путомс тя тевти эсь путксозень,—мярьгсь мокшень цёрась Денис Сяткин.
И. ФАДЕЕВА.