«Идень республиканскяй клиническяй больницясь» Мордовия Республикань здравоохранениянь государственнай бюджетнай учреждениясь тифоль Мордовия Республикань Правительствать 2011 кизонь 5 сентябрень 560-Р№ Распоряжениянц коряс. Тячиень шити Идень республиканскяй клиническяй больницясь—Мордовия Республикаса государственнай лама профилень медицинскяй фкя тяка учреждениясь, кона максси специализированнай, тяконь лувксса оцю технологиянь медицинскяй лезкс стационарнай условиянь пингста, а стане жа—консультативно-диагностическяй лезкс Мордовия Республикань и Россиянь лия региононь 0-18 кизоса шабатненди. Од кизода меле, тяддень январьста, Саранскяйса Р.Люксембургть ульцяса 15/1 кудса панжевсь Идень республиканскяй клиническяй больницять хирургическяй корпусоц, сяс несколька ков ни медицинскяй сембе лезкссь шабатненди макссеви тя адресть коряс. А.И.Полежаевонь ульцяста больницясь ётась ошть юго-западнай пяльксозонза. Лама киза главнай врачекс тя больницяса покоди Российскяй Федерациянь и Мордовия Республикань Заслуженнай врачсь, Мордовия Республикань Здравоохранениянь министерствань иттнень медико-социальнай экспертизаснон коряс главнай аф штатнай специалистсь, медицинскяй наукань кандидатсь О.М.Солдатов, конань мархта аф кунара васьфнесь газетаньконь корреспондентоц. Олег Михайлович оцю мяльса отвечась кизефксонзон лангс.
—Олег Михайлович, тядде Идень республиканскяй клиническяй больницясь ётась од корпусс. И тяни пчкафтомань тя учреждениясь ащи фкя вастса—Саранскяйть юго-западнай пялькссонза. Кульф, што больницяса нолдаф тевс тяфтама одня—мельцеровскяй бокст. Мезе тя?
—Од больницять и ся корпусть, кона нолдаф тевс, эсь лацонь ширец—тяниень пингонь архитектурно-планировочнай решениянза. И вов объектти планонь тиемста азоме тяфтама мяль: лама профилень больницяса улема мельцеровскяй боксненди. Азса мезе тя тяфтамсь. Мельцеровскяй бокссь—тя сембе ширде автономнай, больницять и ульцять ширде башка сувама васттнень мархта помещения. Мезенди эрявкснихть тяфтама боксне? Кепотьксонди, пациентсь пачфтьф сяс, мес теенза тяникиге эряви хирургическяй лезкс, а сонць сяряди инфекционнай кодамовок урмаса (мярьктяма, лифксса). Ускомс сонь инфекционнай больницяв аш кода сяс, мес тоса аш операционнай. Миньцонк, инфекционнай урмать мяльса кирдезь, сонь аш кода путомс отделенияв и палатав лия пациенттнень мархта. Мезе мархтонза тиемс? И вов тяфтама случайхнень пингста лезнихть мельцеровскяй боксне. Эздост миньцонк колма. Эрть эса тиф эрявикс сембе инфрастуктурась. Колмокснень нолясаськ тевс келиста. Тяконь лувксса и ковидть мархта сотф тевса. Мярьктяма, кда пациентсь пачфтеви стама вастста, коса теенза ульсь кода фатямс коронавируссь, примамац мольфтеви мельцеровскяй боксса.
—Кода работайхть врачне тяфтама бокснень эса?
—Эрь сувамстост врачне щашендыхть спецщапт—костюпт, маскат и стак тов.
—Олег Михайлович, больницять видеса ули консультативнай поликлиника. Кода сон работай, кинди можна сёрматфтомс пря приёмс?
—Идень республиканскяй клиническяй больницять видеса консультативнай поликлиникась ёфси лия амбулаторнайхнень коряс. Консультативнай поликлиникать тевоц—макссемс лезкс аф пациентти, а врачти, кона тяда инголе работась пациентть мархта, и кда теенза мезське лядсь аф шарьхкодевикс и эрявкстсь консультация. И вов тя врачсь сёрматфтсы пациентть ширезонк. Тядятненди-алятненди эсь вийса сёрматфтомс консультативнай тя поликлиникав приёмс аш кода. Нинге весть азса: тя тиеви аньцек поликлиникань специалистти. Консультативнай поликлиникаса примамась мольфтеви 11 специальностьс—идень патологиянь сембе ширетнень коряс.
—Мекольдень пингть коронавируссь сяда сетьмось, но ашезь пота. Кода, тя урмать мяльса кирдезь, путневихть идень республиканскяй больницяв пациенттне?
—Госпитализациянди тейнек эряви коронавирусть лангс отрицательнай анализ. Мяльса кирдеви кода идсь, стане и тядясь, кона мады больницяв мархтонза. Кда ни лятфтаськ коронавирусть, азса: эрти эздонк работама коллективнай иммунитетть виияфтоманц лангса, якама вакцинацияс.
—Олег Михайлович, тяниень пингсь канни лама стакада-сталмода марнек ломанень тналть лангс. Кода азоськ вяре, пандемиясь тячис таколфты, канни пелькс, а тяса нинге тяниень обстановкась мирса. Западнай странатнень кяжсна, кона водендаф Россиять лангс. Сембе ваттама сянь мельге, мезе тиендеви Украинаса. Кодапт мяльхне-арьсематне Россиянь Президентть В.В.Путинонь специальнай военнай операциять ётафтоманц коряс примаф решениянц колга?
—Ся, мезе мекольдень пингть тиендеви Украинаса, пелькс аф аньцек тя странати, Россияти, а целайнек мирти. Тяфта лиссь сяс, мес Украинать территорияса васьфтеме «махровай» нацизмать мархта. Бта сон машфтфоль и сяськфоль 1945 кизоня. Но… И тяни военнай сембе тефне мольфтевихть аф украинскяй народть, а Россиять каршес моли западнай кяжи вийхнень мархта. Россиять ёрайхть люпштамс сят, кит лувсазь пряснон миндедонк сери вастса ащикс. Украинаса нацизмась ушедсь няфнема пря аф тяни, а сяда инголи. 2014 кизось валхтозе вельхтердать семботь лангста и няфтезе тянь. Мон, работас коре ялгане, сят, кинь мархта кирдян соткст, кирдьсаськ Россиянь Президентть В.В.Путинонь ширенц специальнай военнай операциять ётафтомаса. Уликс обстановкать мяльса кирдезь, тя, койсон, ульсь фкя сяка виде решениясь. Конашкава маштозь и эсь пингстонза Владимир Владимирович шарьхкодезе, мзярда ушедома тя операциять и путозень эрявикс цельхнень. Марян гордость спецоперацияса участиянь примай военнаеньконь инкса. Улель кода семботь машфтомс-тапамс эстокиге, но вдь тоса улихть мирнай, эряфкшу ломатть, итть. Военнаеньконь эсь тевонь содайкс улемаснон колга можна корхтамс пефтома. Точечнайста тяфта работама маштыхть аньцек афкуксонь профессионалхне. Синь тячи тевснон тиендьсазь мирть араламанкса.
Президентоньконь тевонзон и сатфксонзон колга ули кода корхтамс ламос. Лятфтаса, што сон арась странать руленц ваксс государстваньконди аф тёждя пингть. В.В.Путинонь руководстванц ала одукс кемокстафтольхть Вооруженнай Вийхне и Флотсь. И «Россиять инь цебярь ялганза—флотсь и армиясь» лозунгсь тячи ётафтф эряфс.
—Спасиба!
Т.АЛЬШИНА.