14 июньцта Саранскяйса, Культурань республиканскяй Дворецса, ётафтовсь Медицинскяй работниконь шити лемтьф торжественнай пуромкс. Пингстонза Мордовиянь врачнень, медицинскяй сестратнень и медицинаса работай лия специалисттнень поздравляндазь республикань Оцюнясь Артём Здунов, республикань Государственнай Собраниять Председателец Владимир Чибиркин, республикань здравоохранениянь министрсь Олег Маркин.
Артём Здунов башка мяль шарфтсь медиконьконь афкуксонь профессионалкс улемаснон лангс. Самай тянкса синь маштозь сяськозь сембе стакатнень-сталмотнень, конат эвондакшнесть пчкафтыень кибрясост мекольдень кизотнень. Вов и тянивок Мордовиянь медикне работайхть Херсонскяй областьса аф тёждя условиятнень пингста. Республикань Оцюнясь азсь теест лямбе валхт седикс-ваймокс покодеманкса.
Нацпроекттнень вельде Мордовияса мекольдень пингть панчфт амбулаторият и фельдшерско-акушерскяй пунктт. Тяниень пингть пяк оцю мяль шарфневи специальнай военнай операциянь участникнень реабилитацияснонды и синь семьянь членцнонды лезксонь максомати, здравоохранениять виияфтоманцты.
Тя шиня казнет получасть инь достойнайхне. Россиянь Президентть Указонц мархта Лука Крымскяень медалец максф Н.П.Огарёвонь лемса Мордовскяй государственнай университетонь инфекционнай урмань эпидемиологиянь, фтизиатриянь, дерматовенерологиянь курснень мархта кафедрать заведующаенцты Вера Павелкинати. Вера Фёдоровна пяк лама тись COVID-19 коронавируснай инфекциять инголдаманц и пчкафтоманц, ковидть пингста медикнень работаснон коряс. 2020 кизоня естественно-научнай наравлениять коряс сатозе «Профессор года» лемть.
Республикань Оцюнять Указонц мархта операционнай медицинскяй сестрась Елена Аникина и фельдшерсь-лаборантсь Надежда Крайнова казьфт «За самоотверженный труд» отличиянь знакса.
Мордовия Республикань Оцюнять Благодарностенц мархта казьфт медикне, конат работасть Херсонскяй областьса.
Тя шиня чествовандафтольхть медикнень трудовой династиясна: Миллерхне, конатнень стажсна 170 киза, Аникиттне—синь династияснон стажец 124 киза!
Максфтольхть и лия казнет.
Меле медикнень поздравляндазь Владимир Чибиркин и Олег Маркин.
Татьяна Альшина.