Кой-кона ломаттнень эряфкшуста юмсихть вийсна, аф моли ярхцамс, лафчемкшни мялямсна, синь аф ингольцекс лац няихть и кулихть. Врачне семботь тянь лемнесазь «Сирексшинь астениякс». Мезьса пелькс сон и кода перямс теенза кить? Тянь колга азондсь Мордовиянь Здравоохранениянь министерствань общай врачебнай практикать коряс главнай аф штатнай специалистсь, 5№ Республиканскяй клиническяй больницянь 2№ поликлиникань заведующайсь Елена Викторовна Честнова.
— Сирексшинь астениясь — гериатрическяй синдром, конань пингста кирендихть физиологическяй резервась и ламоц оргаттнень функциясна, — корхтай Елена Честнова. Организмась лафчемкшни, аф сатнихть виенза ащемс каршек аф фкя лацонь урматненди.
Тяниень пингонь медицинаса улихть кит-ятт тя прябалать машфтоманкса. Лезды диспансеризациясь, кона ётафневи «Демография» нацпроектонь «Разработка и реализация программы системной поддержки и повышения качества жизни граждан старшего поколения «Старшее поколение» федеральнай проектть эряфс ётафтоманц вельде.
Сире ломаттненди ётафневи анкетирования, а сяльде теест макссевихть рекомендациять эряфонь койхнень коряс. «Минь васенце рекомендацияньке — физическяй активностсь. Тя фкя инь васенцесь сирексшинь астениять аф нолдаманкса! Омбоцесь — цебярьста ярхцсемась, колмоксть-нилексть суткати. Тяка пингть сивондема сяда кржа ламбама ярхцамбяльде, атказама кальдяв обуцятнень эзда. Стане жа ладяй общественнай эряфса активнай участиянь примсемась, ули пара сувамс волонтёрскяй движенияти, занцемс пря спортса, творчестваса, морсемс, налхксемс шахматса», — азозе Елена Честнова.