Льготнай лекарстватне, медицинскяй учреждениятнень строямасна-петемасна, коронавируссь…

29 ноябрьста ВКонтакте социальнай сетьса «Мордовия Республика» пабликса ётафтф прямой эфирса кизефкснень лангс отвечась Мордовия Республикань здравоохранениянь министрсь О.В.Маркин. Прямой эфирсь мольфтевсь МР-нь ЦУР-ть ширень кирдеманц вельде.
Кой-кона кизефкснень и лангозост ответтнень морафтость газетать тячиень номерсонза.
Мордовия Республикань Оцюнясь А.А.Здунов эрь кизонь Посланиясонза башка мяль шарфтсь здравоохраненияти. Сон китькстазе, што республиканскяй бюджетть 15 процентоц максови медицинати. Кодама полафткст учендсазь Мордовия Республикань эряйхнень? Улихть-аш регионца льготнай препараттнень аф сатнемаснон мархта сотф прябалат? И кода тячиень шитнень республикаса ащи тевсь коронавирусть мархта? Ня и лия кизефкснень лангс отвечась Олег Валентинович Маркин.
—Кода ащихть диабетса и бронхиальнай астмаса сяряди ломаттненди препараттнень аф сатнемаснон и сянь, што ломаттненди тяшнихть аналокт, конат аф лездыхть или аф ладяйхть пчкафтоманди, мархта тефне? Улихть-аш регионца льготнай препараттнень аф сатнемаснон коряс прябалат?
—Мордовия Республикаса тиендеви сембось ломаттнень льготнай категорияснон эрявикс сембе препаратса обеспечендаманкса. Тя категориятне обеспечендакшневихть республиканскяй и федеральнай бюджетонь средстватнень вельде. Тячиень шити сахарнай диабетса сяряди 28 тёжяньда лама пациент. Эздост 1,5 тёжянць—I типонь диабет мархта, конатненди эряви инсулин. 1,5 тёжяньцта 272 ломанць—18 кизоти молемс итть. Мялезе азомс, што и оцюфне, и шабатне, конатненди эрявихть лекарственнай препаратт, тяконь лувксса и инсулин, обеспечендакшневихть тянь мархта. Тядде республиканскяй бюджетть средстванзон эзда тя тевонди нолдаф 229 миллион цалковай.
Тяда башка, Мордовия Республикань Оцюнять А.А.Здуновонь поручениянц коряс, тяддеста сявомок I типонь сахарнай диабетса сяряди 18 кизоти молемс сембе иттне республиканскяй бюджетть средстванзон лангс обеспечендафт глюкозать аф лоткафневи мониторингонц мархта. Ня средстватне кармайхть улема 2023 кизонди бюджетса.
Кда корхтамс бронхиальнай астмаса сярядихнень колга, азса республиканскяй и федеральнай бюджеттнень эзда тя категориянь ломаттненди максф пцтай 25 миллион цалковай. Рамафт аэрозоль и раствор лаца эрявикс лекарстват.
льготнай категориянь граждаттнень обеспечендамаснон мархта улихть кой-кодама прябалат и туфталхт. Лац шарьхкодьсаськ, што кизонь кувалмоста ули кода эвондамс од пациенттненди. Эрявкснихть дополнительнай средстват республиканскяй и федеральнай бюджетста. Кой-кона препараттнень аф сатнемаснон пингста главнай аф штатнай специалисттнень мархта старандатама ваномс тя кизефксть синь эрявикс аналокнень лангс полафтомаснон вельде. Улендихть ёшмот омба масторонь препараттнень пачфнемаснон мархта—тя ульсь мартста-апрельста, мзярда полафтсь логистикась. Тяфтама кизефкснень ванондсаськ сяда курокста.
Кда корхтамс кизефксть омбоце пяленц колга, то 44№ Федеральнай Законть коряс, коса корхтави лекарственнай препараттнень рамамаснон колга, рамамась ётафневи аф торговай лемть, а действующай веществать коряс. Но лац шарьхкодьсайне ся случайхнень, мзярда эвондакшни, кепотьксонди, аллергия тя или тона торговай препаратть лангс, конань получсесы пациентсь. Тянь колга сёрматкшневи сонь амбулаторнай картасонза и врачебнай комиссиять решениянц коряс теенза латцеви эрявикс лекарства.
—Мес сахарнай диабетса сяряди иттненди кирьфтазь тест-полоскатнень лувксснон?
—Глюкозать аф лоткафневи мониторингонц рамаманц вельде ули кода сяда шуроста нолямс тевс тест-полоскатнень. Сканерть и датчикнень улемстост можна эрь шиня ваномс верса сахарть мельге шабать суронц дополнительнайста апак сялгонтт.
—Сатнихть-аф медицинскяй персоналонь кадратне Мордовияса?
—Тядде Мордовияса «Земский доктор/фельдшер» программать коряс трудоустроендаф 9 участковай терапевтт Тя Саранскяйса и республикань райоттнень эса оцю ломаттнень мархта сотф участковай службать коряс кизефксть решандазе марнек. Медицинскяй колледжень и Медицинскяй институтонь шумордай программань эрь участникти моли заработнай платанцты дополнительнай пандома. ФАП-нень эса медперсоналсь пуроптф 94 процентс. Сяда сиденяста ётафнемат профессиональнай осмотрат райоттнень эса.
—Строявихть-аф маластонь кизотнень од больницят, больницянь корпуст?
—2023 кизоня шумордави Рузаевкаса идень поликлиникать строямац. Тяда башка, мольфтеви капитальнай ремонт поликлиническяй учреждениятнень эса. Тядде аделави Саранск ошень 2№ идень, Краснослободскяй и Кочкуровскяй райоттнень эса поликлиникатнень ремонтсна. 2023 кизоня аноклави проектно-сметнай документация райоттнень эса кой-кона поликлиникатненди капитальнай ремонтть тиеманц коряс. Васенце тевкс ащи Саранскяйса онкодиспансерти реконструкциянь тиемась.
—Ули-аш правазе получамс направления идезень лангс, конань коряс теенза ули кода ётамс обследования лия региононь офтальмологическяй больницяса?
—Кда тя эряви, конешна.
—Кода ащихть тефне регионца эпидемиологическяй ситуациять мархта?
—Кафта кизода ламос ни эрятама коронавирусонь пандемиять мархта. Мялезе азомс оцю спасиба региононь эряйхненди. Коронавируснай инфекциять каршес вакцинациять колга тердеманьке кульфтольхть. Тячиень шити Мордовиянь 490 тёжянь эряйсь (тя коллективнай иммунитетть тиеманц планонц 94 процент), ётазь первичнай вакцинациять коронавирусть эзда. И шарьхкодема, што ламода и тянь инкса регионца ситуациясь стабильнай. Повторнай вакцинациять, кона уленди сярядемда меле или мекольдень вакцинацияста 6 ковонь ётазь, ётнема сембонди. Коронавируссь козовок ашезь юма. А марстонь работаньке максы цебярь результатт.
Материалть аноклазе Т.Альшина.