3 декабрьста Мордовиянь Оцюнять мархта ётафтф оперативнай совещанияса ванондовсть регионца эпидемиологическяй ситуациясь и гриппса и ковидса сярятькстомань пельксть аф нолдаманц коряс мератне.
Москуса, Санкт-Петербургса и лия региоттнень эса эпидобстановкась кальдявготкшни, пчкафтомань учреждениятне мртцихть ковиднай госпиталь лаца работань режимти. И тянкса, кода китькстазе Артём Здунов, эрявихть тиендемс сембе профилактическяй мератне. Инь главнайсь эздост—вакцинациясь. Тя сезонть эпидемиолокне учендсазь тувонь кяжи гриппть. Ся ломаттнень, кит нинге ашесть кенере тифтемс прививка, ляткшни кржа пингтост, штоба тянь тиемс. Республикань Здравоохранениянь министерствать даннаензон коряс, гриппсь учендови декабрть омбоце пялестонза. А гриппонь и ковидонь вируснень организмати фкя пингста повомасна нинге сяда стакалгофтсы ситуациять. Работодательхнень инголе путф задача: маластонь пингть тифтемс эсь сотрудникснонды прививкат.
«Мярьгондян сявомс тя кизефксть кеме контроль алу,—китькстазе Мордовиянь Оцюнясь.—Эрьда ванфтсаськ ломаненьконь безопасностьснон».
Башка мяль шарфтфоль медицинскяй учреждениятнень анокшиснон лангс: ваномс койка-вастонь, медикаментонь и медперсоналонь запаснень. Стане жа коронавируснай инфекциять инголдаманц и келемоманцты кить персеманц коряс оперштабть рабочай группац азсь мяль тя недяляста сявомок медицинскяй учреждениятнень эса каннемс маскат, а школатненди—тага ётамс кабинетнай режимонь работати.