Машты и пчкафтома, и седикс-ваймокс корхнема

Аш месть корхтамс, пяк кальдяв, мзярда велеса аш медпункт. Инсарскяй райононь Мокшень Пою велень эряйхнень тяфтама прябаласна ульсь сисем кизода ламос. А сяс тяни синь аф лотксихть кеняртькшнемда—апрель ковста тяса панжевсь ФАП.
Лама киза Мокшень Пою велень медпунктсь работась ташта зданияса. Мзярда эсонза арась пелькс покодемс, примсемс сярядихнень, зданиясь сёлкфоль, а лия мзярс ашель. Вов и сашендовсь ломаттненди арнемс пчксема районнай центрав, Инсарав, а тя аф фкя вайгяльбе. И тяфта сисем кизот. Тевсь полафтсь, мзярда сёлговсь велень школась и тя зданиянь фкя кабинетса максфоль васта ФАП-ти. Помещениясь хуш аф оцю, но тяса ули сембось ломаттненди васенце медицинскяй лезксонь максоманкса. Эстокиге мувсь фельдшерга. Елена Литвинцевась саф мянь Забайкальскяй крайста. Кода азозе сонць, Инсарав нинге 80-це кизотнень ётась эряма сонь брадоц, кона рьвяясь тя аймаконь стирь лангс. 2019 кизоня тяза састь Елена Александровнань тядянза-алянза, а меле ни сонцьке ётась эряма радня ломанензон ваксс. Пялешка киза работась Инсараса сире ломаненди интернатса, а мзярда Мокшень Пою велеса панжевсь ФАП-сь пара мяльса сась покодема тяза.
Елена Литвинцевать медицинскяй образованияц. Забайкальскяй крайса комсь ветие киза трудендась стационарса инфекционнай отделенияса, мекольдень колма кизотнень работась поликлиникаса процедурнай кабинетса. Фельдшеронь тевсь, кле, аф ламода сяда лия, но теенза курокста сембось тонадовсь.
Кода азозе Елена Александровна, ФАП-у сашендыхнень ламошкасна—эряфкшу ломатть (отта Мокшень Поюса, кода и ламоц лия велетнень эса, кржа). Кинь муцсесы гипертониясь, кинь—остеохондрозсь, кинь—сахарнай диабетсь. Фельдшерсь содасы, мезьса лездомс эрти. Кинь давлениянц ункстасы, максы эрявикс лекарства, кинди укол тии. Литвинцевась няфтезе ни прянц кода цебярь специалист. Сон аф аньцек примсесыне велеряйхнень ФАП-са, но и якай сярядихненди кудга. Пизем или лов ульцяса, шить или веньгучкать сявсы чемоданнянц и срхкай ломаттненди лездома. Велеряйхне шнасазь фельдшерть. Сон, кле, аф аньцек лац тиендьсы эсь тевонц, но и машты ломаттнень мархта седикс-ваймокс корхнема. Кинь эряви кулхцондомс—кулхцондсы, кинди эряви совет, эстовок муй мезе азомс.
Елена Литвинцевась лиссь работама «Земский доктор» программать коряс. Сонь мяльса кирдезь велень специалистти государствась макссь 1 миллион цалковай. Получаф ярмакнень Елена Александровна арьсекшни карьхцямс эряма вастонь рамаманкса.
Ольга ЕВДОКИМОВА.