Мордовияса ушедсь гриппть каршес вакцинациясь. Тянь колга пачфни Роспотребнадзорть региональнай Управленияц.
—Мордовияв поступась гриппть эзда вакцинать васенце партияц. Вакцинась—157 тёжянь доза—явф медицинскяй организациятнень ланга. Ушетф населениять гриппть эзда иммунизацияц,—азозь ведомстваса.
Лятфтасаськ, рисконь группатненди сувсихть ломаттне, конатнень улихть хроническяй урмасна, пеки аватне, медицинскяй работникне, учительхне, студенттне, обслуживаниянь сферань и транспортонь работникне.
Специалисттнень валснон коряс, гриппть каршес вакцинациять ётафнема эста, мзярда урмать эпидемическяй касоманцты ляды 2-3 недяля.