ШУМОРДАВСЬ«ОНКОПАТРУЛЬ» АКЦИЯСЬ

8 декабрьста Саранскяйса, Государственнай рузонь драматическяй театраса, ётафтовсь Мордовияса «Онкопатруль» информационно-просветительскяй акциять шумордаманцты лемтьф пуромкс. Акциясь мольсь республикаса 4 декабрьста сявомок 8 декабрти молемс. Ня шитнень инь содаф онколокне ётафтсть диагностическяй и лия мероприятият. Синь аноклазь Россиянь Здравоохранениянь министерствань Радиологиянь НМИЦ-ть специалистонза Федерациянь Советть и Россиянь онколокнень Ассоциацияснон ширень кирдемаснон вельде.
Театраса пуромфненди азфоль, што «Онкопатруль» акцияти Мордовия Республикась лувксс коре арась 27-це регионкс, коса сон ётафтовсь. Тяда башка, Мордовиясь—регион, коса «Онкопатрульсь» шумордазе васенце вете кизонь работанц.
Пуромксса примась участия Мордовия Республикань Оцюнясь Артём Здунов.
Сонь валонзон коряс, тя акциять вельде ломаттнень эвондакшни надиямасна. пелькс тя информациять самдонза меле инь васенцесь ся, што получаец ули анок тянди. Сон азсь оцю спасиба специалисттненди, конат састь Мордовияв.
Россиянь Здравоохранениянь министерствань Главнай аф штатнай онкологсь Андрей Каприн башка мяль шарфтсь сянь лангс, што странань Президентть лезксонц вельде лац ётафневи эряфс онкологическяй пациенттненди лезксонь максомань нацпроектсь. Минь, кле, аш кодамовок пяряфксоньке онкологическяй урматнень эзда. Сярятькстомс ули кода эрти, сяс тевс нолямат од технологиятне, «касфтомат» учениконьке.
Мордовияса «Онкопатрульсь» ётафтсь профилактическяй осмотрат. Пингстост муфтольхть злокачественнай таргозьфт. Специалисттне ётафтсть операцият, исследованият.
Операциятнень эзда фкять аф оцю пяльксоц республиканскяй онкологическяй диспансерста залу пуромфненди няфтьфоль экранца.
Тя шиня республикань Оцюнясь Артём Здунов и Россиянь Здравоохранениянь министерствань Главнай аф штатнай онкологсь Андрей Каприн казезь «Онкопатруль» акциянь специалисттнень и Мордовия Республикань медикнень.
Татьяна АЛЬШИНА.