Сюкпря иттнень шумбрашиснон инкса!

СССР-са Медицинскяй работниконь шись отмечсевсь Верховнай Советть Президиумонц 1980 кизонь 1 октябрень «Праздничнай и мяляфтови шитнень колга» Указонц коряс июнь ковть колмоце недляшистонза. Тяфта тевсь ащи тянивок, тядде Медицинскяй работниконь шись ули 19 июньцта.
Илать колга содайхть и мяляфтыхть кда аф сембе, то пяк и пяк ламотне. Улема, аш стама ломань, кона эряфонь кисонза хуш весть афоль пшкяде лезксонкса медицинскяй работникненди. Синь—минь шумбрашиньконь ванфтысна. Штоба тянь сатомс, медицинскяй работникнень ширде вешевихть эсь тевсост кеме содамошит, афкуксонь профессионалкс улема, виень аф ужяльдезь работама…
Медицинскяй работниконь шить акша халатса ламоц ломаттне васьфнесазь и ётафнесазь работама вастсост, пчкафнемок сярядихнень. Тяфта тевсь ащи и Идень республиканскяй клиническяй больницяса, коса пчксихть и медицинскяй сембе ширдень лезкс получсихть 18 кизоти молемс пациенттне аф аньцек Мордовияста, но и лия региоттнень эзда.
Иттнень и подросткатнень шумбрашиснон петнесазь, а кой-коста и эряфснон инкса тюрихть эсь тевонь содай медицинскяй работникне. Ули кода азомс: Идень республиканскяй клиническяй больницяса работай тевонь содай коллектив. Кой-кона врачнень колга тячи азонттама газетасонк.

Мордовия Республикань Заслуженнай врачсь, Идень республиканскяй клиническяй больницянь идень уроандрологическяй отделениять заведующаец (тя отделенияса улихть и гинекологическяй койка-вастт), Мордовия Республикань Здравоохранениянь министерствань идень главнай аф штатнай урологсь, врачсь—идень урологсь-андрологсь, высшай категориянь врачсь Александр Николаевич Жаров. Сон 1996 кизоня шумордазе Н.П.Огарёвонь лемса Мордовскяй государственнай университетонь медицинскяй факультетть (тяни институт) «Лечебное дело» специальностьс коре. 1997 кизоста сявомок, интернатураса образованиянь получамда меле, работай Идень республиканскяй клиническяй больницяса.
Александр Николаевичень валонзон коряс, тя отделениясь Мордовия Республикаса идень урологиять и андрологиять коряс специализированнай фкя и сяка отделениясь, коса кизоти пчкси 1,5 тёжянть малава идь и тиендеви 600 операция мочеполовой системать лангс. Диагностикась ётафневи пяк рана, мзярда ёмланясь нинге тядянц пекса (20 недяляста сявомок). Тя тевса лезнихть скрининкне, перинатальнай консилиупне.
Уроандрологическяй отделенияса пчксихть шабанят аф аньцек Мордовияста, но и лия республикатнень и региоттнень эзда.
2008 кизоста сявомок идень больницять видеса панчф «Мужское здоровье» центра, коса мольфтеви андрологическяй профилень урма мархта шабатнень сембе ширдень обследованиясна и пчкафтомасна, тяконь лувксса тевс нолявихть пчкафтомань оперативнай метоттне, конат канневихть оцю технологиянь видонь лезксти.
Кода азозе А.Н.Жаров, отделенияса работайхть ниле докторхт. Сембе тиендьсазь тевснон афкуксонь профессионалкс. Сонць Александр Николаевич нинге шабакс сась мяльс сотомс эряфонц ломанень пчкафнемать мархта. Лия вастса, кле, прязень ашине няе.
Аф ваномок сянь лангс, што А.Н.Жаровонь тядяц и аляц аф медицинскяй работникт, мала ломанензон ёткса акша халатса ломатть улихть. Александр Николаевич Жаровонь бабац, Е.И.Жарова, 47 киза (!) макссь медицинати. Великай Отечественнай войнать пингста военнай врачель, сяльде работась терапевтокс. А.Н.Жаровонь двоюроднай брадоц Д.А.Шибаев стане жа врач. Кда корхтамс врачень семейнай марстонь стажснон колга, то сон 200 малава киза.
Одс шачихненди реанимациянь и интенсивнай терапиянь отделениянь заведующайсь, врачсь анестезиологсь-реаниматологсь Наталья Николаевна Аляева.
Шачемас коре сон Саранскяйста. Н.П.Огарёвонь лемса Мордовскяй государственнай университонь медицинскяй факультетть шумордамдонза меле (1997 кизоня), Наталья Николаевна сась работама Идень республиканскяй клиническяй больницяв и вов ни 25 киза тиендьсы врачень тевонц ёмла пациенттнень мархта работамста.
Одс шачихненди реанимациянь и интенсивнай терапиянь отделенияса экстреннай лезкс макссеви шабатненди шачемдост меле эстокиге. Тяда башка, тяса синь получайхть плановай хирургическяй лезкс.
Н.Н.Аляевась азозе, што лезкссь макссеви тяфтама урматнень пингста: церебральнай статусть колавомац, пингта инголе шачемась (тяконь лувксса ронгонь пяк и пяк ёмла сталмоть мархта шабатненди), внутриутробнай инфекциятне и стак тов.
Отделенияв ёмла пациенттнень усксесазь шачфтома кудста и, кда ули хирургическяй патология или внутриутробнай врождённай инфекция, перинатальнай центраста.
Врачсь—анестезиологсь-реаниматологсь Н.Н.Аляева тя профессиять кочказе аф стак. Тядянц ширде раднянза эряфснон лемдезь медицинати. Ётксост кафта хируркт, терапевт, пеень пчкафты врач, ветеринар, фельдшер.
Медиконь тевть, лангозост ванозь, лама кизода инголе кочказе и маштозь, ваймонь путозь мольфтьсы Н.Н.Аляева. Цебярьста работаманкса сон казьф Мордовия Республикань Правительствать Почётнай грамотанц мархта.
Идень республиканскяй клиническяй больницяса ули идень онкологическяй отделения, конань заведующаец высшай категориянь врачсь Мария Георгиевна Галкина. Кода и работас коре ламоц ялганза, М.Г.Галкина шумордазе Н.П.Огарёвонь лемса Мордовскяй государственнай университетонь медицинскяй факультетть. И вов ни 20 лама киза работай тя больницяса. Онкологиять и гематологиять коряс содамошит М.Г.Галкина пуропнесь Россиянь инь содаф университеттнень, федеральнай клиникатнень эса. Ульсь стажировкаса Израильса. Мария Георгиевнань колма специальностенза—гематологонь, идень онкологонь, педиатронь.
М.Г.Галкинать валонзон коряс, Мордовия Республикаса идень онкологиянь показательсь пцтай стама, кода и Россиять эзга среднестатистическяй даннайхне.
Идень онкологическяй отделенияса 20 койка-васта. Пчксихть шабатне кода онкологиять, стане и гематологиять эзда.
Иттнень ёткса инь сидеста васьфневи лейкозсь (нинге теенза мярьгихть веронь рак), сяда тов молихть лимфоматне и стак тов.
Идень больницять онкологическяй отделениясонза кизоти ётни обследования и пчкси 400 малава пациент. Тяса тевс нолявихть диагностическяй и пчкафтомань ламоц процедуратне: пакарень-уень и люмбальнай, щитовиднай железань пункциятне, РКТ и МРТ-исследованиятне, тиендевихть биохимическяй аналист. Фалу мольфтеви исследованиянь од метоттнень тевс нолямасна. Тяни тя отделенияса ули эсь хирургсна-онкологсна и эрявикс операциятне тиендевихть тязк.
Мария Георгиевна Галкина идень онкологическяй отделенияса заведующай 2019 кизонь апрельста сявомок. Тевоц аф тёждятнень эзда, но сонь мялезонза. Медицинати кельгомась ётась теенза инь мала ломанензон эзда. Шачсь М.Г.Галкина врачень семьяса. Тядяц, Людмила Николаевна, 40 киза работась офтальмологическяй больницяса медицинскяй частть коряс начальникокс, щаванц, Анна Флоровнань эряфоц сотфоль иттнень мархта—сон 50 киза педиатроль.
Светлана Шамилевна Алдаркина идень хирургическяй отделенияса врач-хирург. Шачемас коре сон Кадошкинскяй райононь Латышовка велеста, тоса 2004 кизоня отличия мархта шумордазе школать, поступась Н.П.Огарёвонь лемса Мордовскяй госуниверситетонь медицинскяй факультету. Семьясост С.Ш.Алдаркина васенце врачсь. Нинге шабакс мярьгсь эстеенза, што сотсы эряфонц хирургиять мархта. Медицинскяй институтть аделамдонза меле шумордазе идень хирургиять коряс клиническяй ординатурать и сатозе арьсефонц. 2012 кизонь 1 сентябрьста сявомок Светлана Шамилевна работай идень больницяса.
Эрь шиня идень хирургсь несколькаксть сявондьсыне кядезонза медицинскяй эрявикс инструменттнень, штоба лездомс ёмла шабанятненди. Вов и мархтонза корхтаманьке ульсь операцияда меле. Тевонц пяк кельгсы, фалу муй марстонь кяль работас коре ялганзон, пациенттнень мархта. С.Ш.Алдаркина работанц киза пяле мархтос кадондозе аньцек весть—стирнянц Дарьять шачемста. Но, аф ваномок тянь лангс, прясонза фалу шарсть кельгома тевонц колга мяльхне.
Шити кой-коста уленди 5-6 плановай операция, но теест полаткшнихть и экстреннайхне.
Эрь шиня Светлана Шамилевна Алдаркина эряскоды кельгома работазонза, а инь оцю кенярдемась теенза—няемс, кода пчкси тя или тона пациентсь, конанди сон макссь хирургическяй лезкс нинге ёфси аф кунара.
Малаткшни праздниконтень мархта, медицинскяй работникт!
Т.Альшина.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...