23 июньцта Республикань Кудса ётафтовсь коронавируснай инфекциять инголдаманц и келемоманцты кить персеманц коряс оперативнай штабть заседанияц.
Региональнай Правительствать Председателенц заместителец Галина Лотванова пачфтезе, што недяляста коронавируснай инфекцияса сярядихнень лувкссна кирсь пцтай 13 процентта. Республикань кота райоттнень эса: Большеигнатовскяйса, Дубёнскяйса, Кадошкинскяйса, Старошайговскяйса, Ромодановскяйса и Темниковскяйса сисем шиста ашезь сярятькста фкявок ломань.
Стане жа Мордовияса сяда кржа арась стационарнай сярядида: тячи ковиднай госпитальхнень эса пчкси 145 ломань.
Виде, тяфтама стабильнай ситуациянь пингстовок улихть пелькст, конатненди ули кода срхкафтомс сярядихнень лувксснон касоманц: кизонь пингть кондиционерхнень сидеста тевс нолямасна, Россияса омикрононь од штаммть эвондамац и омба масторонь странатнень эса сярядихнень лувксснон касомац.
Регионца контроль ала кирдеви тефнень ванфтоманкса эряви эсь пингстонза ётафнемс населениять вакцинациянц и ревакцинациянц. Тя лезды пуроптомс эрявикс коллективнай иммунитет, кона тяниень пингть коль кири и арась 30 процент оцю населениять эзда.
Мордовиянь Правительствать Председателец Владимир Сидоров макссь поручения муниципальнай райононь оцюнятненди лична ваномс вакцинациянь кизефкснень мельге, штоба аф нолдамс сёксенда эпидемиять мархта сотф тефнень кальдявгодомаснон. Вакцинада регионца сатомшка—12 тёжяньда лама доза, тяконь лувксса шабатнендивок. Тяда башка, медицинскяй учреждениятненди мярькф виияфтомс населениять диспансеризациянц, а стане жа ся ломаттнень крхка диспансеризацияснон, конат сярядсть ковидса.