Россияса Медицинскяй работниконь шись эрь кизоня уленди кизоть васенце ковонц колмоце недляшистонза, сяс тядде профессиональнай илась савсь 16 июнти. Седиста моли лямбе валхт тя шиня кулихть оцю странаньконь медицинскяй сембе работниконза. Сят, кит аф ужяльдьсазь эсь пингснон и вийснон и тиендьсазь семботь тейнек медицинскяй лезксть максоманкса, а кой-коста медикнень эзда ащи и ломанень эряфсь. Кивок эздонк апак аралак урматнень эзда. И кда марясаськ пряньконь кальдявста, эстокиге мольхтяма враченди. Содасаськ, сон тейнек лезды. И больницяса ащемста эрь шинь обходста надиятама кулемс пчкафтыеньконь эзда мялень кеподи валхт: «а тячи тефне сядовок петевсть, курок куду туят».
Медицинскяй работникокс аф арсихть, а шачендыхть. Тя аф аньцек сай пингонь профессия, конань кочказе эстеенза школать шумордаец. Врачекс улемась—асу. Шятямок медицинань кити-янти, ломанць шарьхкотькшнесы: тяни тевоц сотф эряфса инь главнайть—шумбрашить ванфтоманц и кемокстаманц мархта. Тянь лангс оцюдонга оцю мяль шарфнихть и вярдень вастса ащихне. Лама тиендеви «Здравоохранение» национальнай проектть эряфс ётафтоманц инкса. Тяда башка, тевсот «Земский доктор», «Земский фельдшер» программатне.
«Земский доктор» программать коряс Рузаевскяй центральнай районнай больницять анестезиологиянь—реанимациянь и интенсивнай терапиянь отделениясонза работай врачсь—анестезиологсь-реаниматологсь Александр Мазов.
Медицинскяй работниконь шинь каршеня газетаньконь корреспондентоц васьфнесь Александр Владимировичень мархта. Оцю мяльса пачфттяма асу од врачть колга.
Васенце кизефкссь, конань максыне Александр Мазовонди, тяфтамоль: мес сон кочказе врачень профессиять? Александр Владимирович отвечась, што мала ломанензон ёткса медикт ашельхть. Но шабакс улемстонза сон аф шуроста сярятькшнесь, сяс сашендовсь ащекшнемс больницяса.
«Ванондонь врачнень лангс, синь тевснон мельге, кода пчкафнихть ломатть, и сань тяфтама мяльс: касомок, сотомс эряфозень медицинать мархта. Улема, теенза кельгомась ульсь эсон нинге шачемстон, сяс мес идень мяльхне-арьсематне ашесть юкстав, а аньцек кемокстасть»,—лятфни врачсь—анестезиологсь-реаниматологсь Александр Мазов.
Шачсь сон Саранск ошень округонь Октябрьскяй райононь Луховка посёлкаса, эрясь Озёрнай посёлкаса. Тяниень пингть работай Рузаевкаса, а эряма васта эстеенза строясь Саранскяйть маласа Макаровка велеса.
Мазофнень семьяса колма итть, Александр—лувксс коре омбоцесь. Тядянза-алянза, Людмила Михайловна и Владимир Викторович, трудонь кельги ломатть.
Врачекс арамать колга Александр Владимирович арьсесь и Озёрнай посёлкань средняй школаса тонафнемста. Сяс 9-це классть шумордамдонза меле поступась Саранскяень Медицинскяй колледжу «Сестринское дело» отделенияти. И тиезе тянь оцю мяльса.
«Медицинскяй колледжу поступамась и тоса тонафнемась арасть васенце аськолксокс арьсефозень сатоманцты—врачекс арамати».
Колледжса Александр Владимирович тонафнесь ниле кизот. Практиканц ётнезе республиканскяй больницяса (сон эста ульсь Васенконь ульцяса) и 3№ республиканскяй больницяса. Общай практикать пингста работась сярядихнень мархта. Александр Мазов шарьхкодезе, што тя сембось—сонь, и эряви тонафнемс сяда тов. Ниле кизотне ётасть пяк курокста.
Дипломть получамдонза меле цёрась поступась Н.П.Огарёвонь лемса Мордовскяй государственнай университетонь Медицинскяй институту.
«Кирдемок мяльса сянь, што аделайне Саранскяень Медицинскяй колледжть, поступань Мединститутть илядень отделениязонза, коса тонафнень колма курст. Нилецеса ётань шинь отделенияв».
Аш кода аф азомс, што васенце курсса цёрась сявондсь академическяй отпуск армияв тумать инкса. Служась мотострелковай войскатнень эса Дальняй Востокса. «Дембельда» меле поладозе тонафнеманц. Илядень отделенияса тонафнемста Александр Владимирович работась.
«Шарьхкодень, эряви лездомс тядязти и алязти. Вдь эздонк колма. Мунь работама васта республиканскяй больницяса консультативнай поликлиникаса, коса медицинскяй братолень. Работань оцю мяльса, сяс мес практикась аш ни кода цебярель. Васенда процедурнай кабинетсолень, меле ащень врачть-ревматологть мархта приёмса».
Шинь отделенияти ётамдонза меле ушедсь работама стационарса—ревматологическяй отделенияса. Лиякс азомс, институтса тонафнемста Александр Владимирович пцтай фалу покодсь.
Кота пяле мархта кизот тонафнесь Медицинскяй институтса общай практикань врачекс, а меле нинге кафта кизот ординатураса. Ниле профессиятнень эзда кочказе анестезиологоннеть-реаниматологоннеть. Мес? Сяс мес, кле, тя алянь работа—аралакшнемс эряфнень, аф ваномок тонцень прябалатнень и тефнень лангс.
«Кда араласак ломанть, лездат теенза—ваймосот эвондакшни кенярдема».
Ординатурать вельде цёрась касфтозе квалификациянц и арась врачекс—анестезиологокс-реаниматологокс. Кулезе, што Рузаевскяй центральнай районнай больницяв эрявихть врачт. И, «Земский доктор» программать мяльса кирдезь, Александр Мазов ушедсь работама железнодорожникнень ошса.
«Молень Рузаевкав, содафтонь коллективть мархта. тоса работайхть эсь тевонь содай, асу, пара вайме ломатть. Фалу анокт лездомс фкя-фкянди. Вестевок ашень каенда, мес кочкайне Рузаевскяй больницять!»
Александр Владимирович лама шнамань вал азсь больницянь главнай врачть Алексей Назаровонь колга. Алексей Леонидович ломаттнень мархта мушенды марстонь кяль, коллективса сонь оцю авторитетоц. Тиендьсы семботь, штоба Рузаевскяй центральнай больницяса работайхне лезнельхть ломаттненди ванфтомс и араламс эряфса инь питнить—шумбрашить.
Тячиень материалоньконь героец работай фкя, улема, инь стака отделениятнень эса. Реанимацияв путнесазь стакаста сярядихнень. И кда анестезиологсь максси наркост операциятнень пингста, то анестезиологсь-реаниматологсь работай и реанимациянь палататнень эса ащихнень мархта. Ётксост сят, кит кодамовк туфталонкса прашендыхть вярдень вастста, толса-мезьса пицефне, кинь шумбрашис «чакасть» инфарктсь, инсультсь…
«Тиендьсаськ семботь, штоба лездомс теест. Улендихть случайхть, мзярда ломаттнень мрдафнесаськ тонашиста».
Анестезиологсь-реаниматологсь кизефксонень лангс отвечамста сидеста нолязе тевс минь местоимениять. Кепотьксонди, минь работатама, минь мрдафнесаськ и стак тов. Тянь эзда шарьхкотькшневсь, што больницяса сембось тиендеви марстонь вийса, сяс и результаттневок кеняртьфтихть. Саранскяень врачсь кунара арась эсь ломанькс. «Земский доктор» программать аделавомдонза меле арьсекшни лядомс работама Рузаевскяй центральнай районнай больницяв. Тонадсь аф аньцек тя учрежденияти, коллективти, но и Рузаевкань эряйхненди. Мезенди, кле, полафнемс сянь, мезсь мялезон?
Александр Владимировичень рьвац, Наталья Владиславовна, образованияс коре провизор. Мазофнень кафта идьсна. Цёрасна, Матвей, тядде моли 1 -це классу, стирняснонды, Аринанди, ниле кизонят, якай идень саду.
Цебярьста работаманкса Александр Владимирович казьф Рузаевскяй больницянь главнай врачть, Мордовия Республикань здравоохранениянь министрть Благодарностьснон мархта. И нинге. 2018 кизоня Александр Мазов ульсь стюартокс, мзярда Саранскяйса ётафтовсть Футболть коряс Миронь чемпионатть кой-кона матченза. Тянксовок сон казьфоль грамотаса.
Корхнеманьконь шумордамста Александр Владимирович газетать вельде поздравляндазень Медицинскяй работниконь малаткшни шить мархта сембе медикнень, башка—Рузаевскяй центральнай районнай больницять марнек коллективонц. Арьсесь кеме шумбраши, сатфкст и сембе цебярть! Миньге тякоть арьсесаськ!
Татьяна Альшина.