Агаркофнень семьясна кочказе мокшэрзянь крайть

Мзяра идь—сняра паваз. Кенярди седице, мзярда ня валхнень аф аньцек кульсайть или морафтсайть, но и няйсайть «тевса». Ветень-крда павазукс эсь пряснон лувсазь Рузаевкаста Наталья и Евгений Агаркофне, конат касфтыхть вете цёрат.
Наталья Анатольевна и Евгений Юрьевич, нинге мзярда ашесть сода фкя-фкянь, арьсесть лама идень семьянь колга. Шачемас коре кафцьке Рузаевканнет, тяса кассть-венемсть, тонафнесть, пуроптсть семья. «Машина кинь столицаса» работайхть, строясть куд. Мезенди, кле, тушендомс шири, кда тясовок ули кода лац-ряц эрямс? Кафцьке арьсихть, што коса шачеть, тоса и кондястеть валхне пяк и пяк видет. Ёфси, кле, колганк.
Наталья Анатольевна шачсь Рузаевкаса мокшень семьяса. Нинге ёмласта ушедсь арьсема медицинскяй работникокс арамать колга. Васенда шумордазе Ардатовскяй медицинскяй училищать, получась «Сестринское дело» специальность. Меле поступась М.Е.Евсевьевонь лемса Мордовскяй государственнай педагогическяй институту, конань аделамдонза меле арась «Педагогика и психология» специальностть («Олигофренопедагогика» дополнительнай специальность мархта) коряс педагогокс-психологокс и учителькс—олигофренопедагогокс. Кода няйсаськ, васенце и омбоце специальностенза сотфт ломаттненди лездомать и, кой-конашкада, иттнень мархта.
Сай пингонь мирденц, Евгений Агарковонь мархта, арась содафокс лама кизода инголе Рузаевкань Железнодорожнай больницяса, коса мокшавась работась офтальмологическяй кабинетонь медицинскяй сестракс, а цёрась сась медицинскяй комиссиянь ётама. Од ломаттне тусть фкя-фкянь мяльс, ушедсть васьфнема, а кафта кизода меле рьвяясть.
—Сай пингонь мирдезе седизон «тапась» киня трудти кельгоманц, стакада-сталмода аф пелеманц мархта. Шарьхкодень, што лангозонза ули кода надиямс,—мярьгсь лама идень тядясь.
Полатне арьсесть лама шабань колга, а нинге—штоба семьясна эряль оцю кудса. Кода целайнек странасонк, стане и Мордовияса семьятненди, и, конешна, лама иденнетненди, государствать ширде шарфневи пяк оцю мяль, макс-
севи лезкс. Мзярда Агаркофне арасть тядякс-алякс колмоцеда, получасть модань участка Рузаевкаса. Тяда инголе эрясть сивотьф, а меле ипотекас сявф фкя комнатань квартираса. Нилеце цёраняснон шачемда меле лама идень семьясь арась очередьс эряма вастонь условиятнень цебярьгофтоманкса. Кизода меле теест максфоль сертификат, конань вельде Наталья Анатольевна и Евгений Юрьевич ушедсть государствать эзда получаф модань участкаснон лангса кудонь строяма.
Рузаевкаса Агаповонь ульцяса кудсь, конань площадец 109 квадратнай метра, строяфоль кизошкада меле. Но тевда нинге ламоль и сотфтольхть синь инженернай коммуникациятнень, газть ётафтомаснон, ремонтонь тиемать, мебельть и лия сембе эрявиксть рамамаманц мархта. И вов мелять шумордамста сембось аноколь. Лама идень семьясь ётась од кудозост.
Азонттама Агаркофнень идьснон и синцень тядятнень-алятнень колга.
Сембода оцю цёрасна Владимир—Н.П.Огарёвонь лемса Мордовскяй государственнай университетонь студент. Тонафни 2 курсса Машиностроениянь Рузаевскяй институтса информационнай системань и программированиянь специальностть коряс. Цёрась—активист. Сувси «Движение Первых» организацияти, руководитель антитеррористическяй секторса.
Дуганоц, Илья, тонафни Рузаевкань 7№ средняй школаса 8 класса. Инголи якась музыкальнай школав, коса тонафнесь гитараса морама.
Михаил тонафни 4 класса. Сонга якай музыкальнай школав, тонафнесы балалайкать. И нинге якай каратэ единоборствас.
Константин—2 классонь ученик. Миша альняканц мархта якай единоборствас.
Мирон—сембода ёмла шабась лама идень тя семьяса. Теенза колма кизонят, якай идень саду.
Семьянь азорсь, Евгений Юрьевич, кунара покоди машина киса ремонтникокс. Рьвац, Наталья Анатольевна, стаки работай медицинскяй сестракс, аньцек лия вастса—Рузаевкань Центральнай районнай больницять диагностическяй отделениясонза.
Ветеце цёраснон шачемда меле кизонь ётазь иттнень воспитандамаса сатфксонкса, семьянь инь цебярь койхнень виияфтоманкса и синь вельмофтемаснонды оцю путксонкса Мордовия Республикань Оцюнясь Артём Здунов казезе мокшавать Мордовия Республикань лама идень Тядянь III степенень Почётнай дипломса.
Мелянь 8 Мартста Рузаевскяй муниципальнай райононь оцюнясь Александр Юткин казезень мирттнень-рьвятнень Агаркофнень Благодарственнай сёрмаса, конань эса корхтавсь синь лама идень семьяснон—марнек странати и эрь ломанти кеме нежеть колга.
Агаркофне ётасть од кудозост эряма мелянь 28 декабрьста—вчёк Од кизонь карша, и тя илать васьфтезь эсонза ни. Но тяда инголе, несколька киза мельцек, строяф эряма вастсна ульсь дача лаца, коза путнесть оцю пере. Модань участкать получамдонза меле эстокиге озафтсть черешнят, марлюфт, шукшторукст, понав шукшторукст, лакштормарькст, викторият. Эрь кизоня озафнихть перень сёрот: модамарьхть, шурьхкят, редист, томатт, куярхт, кабачокт, арбуст, тиклат, витцихть снав.
Наталья Анатольевнань валонзон коряс, семьяснон улихть льготасна Мирононь инкса идень садонкса и жилищно-коммунальнай услугатнень инкса пандомаса.
Кода полацень мархта кенерькшнетяда сембе вастова? Тя кизефксть лангс мокшавась, вете идень тядясь отвечась, што сяда оцю шабатне сембоса лезнихть, тяконь лувксса и дуганцнонды.
Агаркофне Мордовияса шачсть-кассть, пуроптсть семья, конань эса шачсть вете шабат. Государствать лезксонц вельде строясть куд. И работайхть республикасонк, конань лувондсазь инь мазыкс и цебярькс.
Татьяна Альшина.